Regulation on the manner of issuing authorizations to control/certification bodies for the performance of expert control and professional scientific institutions or other legal entities for the performance of analyzes and superanalyses in organic agricultural production, the necessary documentation, the form, the content and the manner of keeping the records

МИНИСТЕРСТВО ЗА ЗЕМЈОДЕЛСТВО, ШУМАРСТВО И ВОДОСТОПАНСТВО Врз основа на член 50, став (3) од Законот за органско земјоделско производство (,,Службен весник на Република Македонија" бр.146/09}, министерот за земјоделство, шумарство и водостопанство донесе ПРАВИЛНИК ЗА НАЧИНОТ НА ИЗДАВАЊЕ НА ОВЛАСТУВАЊАТА НА КОНТРОЛНИ/СЕРТИФИКАЦИСКИ ТЕЛА ЗА ВРШЕЊЕ НА СТРУЧНА КОНТРОЛА И СТРУЧНИ НАУЧНИ УСТАНОВИ ИЛИ ДРУГИ ПРАВНИ ЛИЦА ЗА ВРШЕЊЕ НА АНАЛИЗИ И СУПЕРАНАЛИЗИ ВО ОРГАНСКОТО ЗЕМЈОДЕЛСКО ПРОИЗВОДСТВО, ПОТРЕБНАТА ДОКУМЕНТАЦИЈА, ФОРМАТА, СОДРЖИНАТА И НАЧИНОТ НА ВОДЕЊЕ НА ЕВИДЕНЦИЈАТА* * Со овој правилник се врши усогласување со Регулативата на Комисијата (ЕЗ) бр.889/2008 од 5 септември 2008 год. со која се утврдуваат правилата за спроведување на Регулативата на Советот (ЕЗ) бр. 834/2007 за органско производство и етикетирање на органските производи во однос на органското производство, етикетирање и контрола, CELEX бр. 32008R0889 и Регулативата (ЕЗ) бр. 834/2007 на Советот од 28 јуни 2007 година за органско производство и етикетирање на органски производи и за укинување на Регулативата (ЕЕЗ) бр. 2092/91, CELEX бр. 32007R0834 Член 1 Со овој правилник се пропишува начинот на издавање на овластувањата на контролни/сертификациски тела за вршење на стручна контрола и стручни научни установи и други правни лица за вршење на анализи и суперанализи во органското земјоделско производство, како и формата, содржината и начинот на водење на евиденцијата. Член 2 (1) Овластување за вршење на стручна контрола во органското земјоделско производство издава Министерството за земјоделство, шумарство и водостопанство (во понатамошниот текст: Министерство) врз основа на поднесено барање на заинтересираното контролно/ сертификациско тело. (2) Кон Барањето од став (1) на овој член подносителот ја доставува и следната документација со која го докажува исполнувањето на условите од член 46, став (2) од Законот за органско земјоделско производство: а) копија од сертификат за акредитација издаден од страна на Институтот за акредитација на Република Македонија со кој се потврдува дека се исполнети општите барањата за сертификација на производи или потврда дека е во процес на стекнување на сертификат за акредитација, издадена од страна на Институтот за акредитација на Република Македонија; б) тековна состојба издадена од Централен Регистар на Република Македонија на правното лице не постара од 6 месеци; в) за две вработени лица: уверение за завршено високо образование од областа на земјоделството, шумарството, ветеринарството, биотехнологијата или технолошките науки; пријава/одјава во задолжително социјално осигурување- образец Ml/M2; биографија потпишана и заверена со печат од страна на одговорното лице во правното лице; и потврда за работно искуство издадена од институцијата каде истото е стекнато; г) имотен лист или договор за закуп на деловен простор, заверен кај нотар; д) изјава за поседување на соодветна опрема; ѓ) органограм на организациската поставеност во контролното/сертификациско тело; е) изјава дека не врши советодавна активност за субјектите над кои врши контрола и (ж) изјава дека активостите на контролното/сертификациско тело не се во спротивност со Законот за спречување судир на интереси. Член 3 (1) Овластување за вршење на анализи и суперанализи во органското земјоделско производство издава Министерството врз основа на поднесено барање на заинтересираната стручна научна установа и друго правно лице. (2) Кон Барањето од став (1) на овој член подносителот ја доставува и следната документација со која го докажува исполнувањето на условите од член 49 од Законот за органско земјоделско производство : а) копија од сертификатот за акредитација во чиј во опсег прецизно се дефинирани методите на испитување потребни во органското земјоделско производство, издаден од страна на Институтот за акредитација на Република Македонија со кој се потврдува дека се исполнети општите барања за компетентност на лабораториите за тестирање и калибрација или потврда дека е во процес на стекнување на сертификат за акредитација, издадена од страна на Институтот за акредитација на Република Македонија; б) тековна состојба издадена од Централен Регистар на Република Македонија на правното лице не постара од 6 месеци; в) за три вработени лица: уверение за завршено високо образование од областа на хемиско-технолошките, биотехнолошките, биохемиските, ветеринарните или земјоделските науки; пријава/одјава во задолжително социјално осигурување- образец Ml/M2; биографија потпишана и заверена со печат од страна на одговорното лице во правното лице; потврда за работно искуство издадена од институцијата каде истото е стекнато; г) имотен лист или договор за закуп на деловен простор, заверен кај нотар и д) изјава за поседување на соодветна опрема за вршење на анализи и суперанализи во органското земјоделско производство. Член 5 (1) Евиденцијата на контролни/сертификациски тела и стручни научни установи и други правни лица се води во електронска форма и се објавува на интернет страницата на Министерството. (2) Евиденцијата од став (1) на овој член се води врз основа на издадените овластувања од Министерството за вршење на стручна контрола односно анализи и суперанализи во органското земјоделско производство. Член 6 Евиденцијата од член 5, став (1) на овој правилник ги содржи следните податоци: назив на овластеното контролно/ сертификациско тело или стручно научната установа и други правни лица; седиште и адреса; контакт телефон и електронска адреса; име и презиме на управителот на правното лице; ЕМБС; жиро сметка; број на сертификат за акредитација и датум на издавање на сертификатот за акредитација. Член 7 Овој правилник влегува во сила наредниот ден од денот на објавувањето во „Службен весник на Република Македонија". Бр. 08-8103/6 26 ноември 2010 година Скопје Министер за земјоделство, шумарство и водостопанство, Љупчо Димовски, с.р.