Regulation No. 14 on safety zones for offshore snstallations and accommodation vessels

§ 1. Nalunaarut manna sinerissap avataani sanaartukkat aamma umiarsuit unnuisarfiit Kalaallit Nunaata imartaaniittut imaluunniit nunavittaaniittut eqqaanni isumannaallisaanermut killeqarfiliussani atorneqassaaq. Imm. 2. Isumannaallisaanermut killeqarfiliussat iluanni nalunaarut, umiarsuarnut angallatinullu allanut, silaannakkut angallatinut, sinerissap avataani sanaartukkanut angallanneqarsinnaasunut aammalu sanaartukkanut allanut angallanneqarsinnaasunut aaqqissuussanullu, tamatumunnga atatillugu imaani ingerlaartunut, kalittunut imaluunniit kisarsimaartunut, kiisalu aalisarnermut atortunut, kisanut, pituttuinermut atortunut allanut, atortunut allanut aammalu pequttanut allanut atorneqassaaq. Imm. 3. Nalunaarut atorneqassaaq, sanaartukkat angallatillu ilaalu ilanngullugit imm. 1-imi aamma 2-imi taaneqartut kalaallinit, danskinit imaluunniit nunanit allamiunit pigineqarnersut apeqqutaatinnagu. Isumannaallisaanermut killeqarfiliussat

§ 2. Sinerissap avataani sanaartukkat aamma umiarsuit unnuisarfiit, sanaartukkat imaluunniit umiarsuit imaani ingerlaartinnagit imaluunniit kalitsinnagit isumannaallisaanermut killeqarfiit iluaniipput. Imm. 2. Sinerissap avataani sanaartugaq imaluunniit umiarsuaq unnuisarfik imm. 1-imi pineqartunut ilaasoq immap qaavani takuneqarsinnaasimanngippat, puttaqummik nalunaaqutserneqassaaq imaluunniit allamik ersittumik Naalakkersuisunit akuerineqarsimasumik nalunaaqutserneqassaaq. Imm. 3. Isumannaallisaanermut killeqarfiliussaq, killinganit silarlernit tamanit imaluunniit allamit nalunaaqutsersuutitut atorneqartumit uuttorlugu, sanaartugaq imaluunniit umiarsuaq kaajallallugu 500 meterinik annertussuseqassaaq. Qummuinnaq (napparissumi) immap naqqaniit sanaartukkap imaluunniit umiarsuup portunerpaaffianut isumannaallisaanermut killeqarfiliussaq 500 meterinik portussuseqarpoq. Nallarissumi (narlorissumi) sanaartukkap imaluunniit umiarsuup killinganit silarlernit tamanit isumannaallisaanermut killeqarfiliussaq 500 meterinik isorartussuseqarpoq, taanna taassuma sukkulluunniit sumiiffiani inissisimassalluni. Imm. 4. Sinerissap avataani sanaartukkap aamma umiarsuup unnuisarfiup sumiiffia imm. 1-imi pineqartoq, Umiartortunut Tusarliussani tamanut saqqummiunneqartassaaq. Umiartortunut Tusarliussani tamanut saqqummiussineq, Naalakkersuisunit allamik aalajangiisoqarsimanngippat, pisinnaatitsissummik pigisaqartumit ingerlanneqartassaaq. Imm. 5. Naalakkersuisut isumannaallisaanermut killeqarfiliussap isorartussusissaanit imm. 3-imi aalajangersarneqartumit allaanerusumik aalajangiisinnaapput. Allaanerusumik isorartussusiliinermi isumannaallisaanermut killeqarfiliussaq annertusineqarsinnaavoq imaluunniit annikillineqarsinnaalluni aammalu piffissamut aalajangersimasumut aalajangersarneqarsinnaalluni. Allaanerusumik isorartussusiliineq Umiartortunut Tusarliussani tamanut saqqummiunneqassaaq. Umiartortunut Tusarliussani tamanut saqqummiussineq, Naalakkersuisut allamik aalajangiisimanngippata, pisinnaatitsissummik pigisaqartumit ingerlanneqassaaq. Imm. 6. Navianartorsiornermi imaluunniit ajutoornermi, inuit ajoqusernerannik imaluunniit inuup inuuneranik annaasaqarnermik, annertuumik mingutsitsinermik, atortutigut annertuumik ajoqusiinermik imaluunniit pingaarutilimmik tunisassiornerup unitsinneranik kinguneqarsinnaasumik pisoqarnerani, ajoqusiinerit sunniutaasut taaneqartut pitsaaliorniarlugit, pinngitsoortinniarlugit imaluunniit killilersimaarniarlugit, Naalakkersuisut isumannaallisaanermut killeqarfiliussat pioreersut annertusisinnaavaat imaluunniit killeqarfiliussanik nutaanik pilersitsisinnaallutik. Isumannaallisaanermut killeqarfiliussanik pioreersunik annertusititsineq aamma killeqarfiliussanik nutaanik pilersitsineq, Umiartortunut Tusarliussani tamanut saqqummiunneqassapput. Tusarliussani tamanut saqqummiussineq, Naalakkersuisunit allamik aalajangiisoqarsimanngippat, pisinnaatitsissummik pigisaqartumit ingerlanneqartassaaq. Isumannaallisaanermut killeqarfiliussanut isersinnaaneq aamma ingerlatat

§ 3. Umiarsuit angallatillu allat, sanaartukkat, silaannakkut angallatit, aaqqissuussat, atortut pequttallu allat, sinerissap avataani sanaartukkamut imaluunniit umiarsuarmut unnuisarfimmut inatsisinik unioqqutitsinngitsumik susassaqarsimanngikkunik, killeqarfiliussat § 2, imm. 1-imi taaneqartut iluannut ingerlanissaat akuerisaanngilaq. Imm. 2. Naalakkersuisut immikkut ittumik pisoqartillugu imm. 1-imi inerteqquteqarnermi ilaatitsinnginnissaq pillugu aalajangiisinnaapput, ilanngullugu aalisarnermut piniarnermullu tunngatillugu, aammalu tamatumunnga atugassarititaasussanik erseqqinnerusunik aalajangersaasinnaallutik. Pineqaatissiissutit

§ 4. Akiliisitsissummik pineqaatissinneqassaaq piaaraluni imaluunniit peqqarniitsumik mianersuaalliorluni: 1) nalunaarummi matumani maleruagassamik malinninngitsoq, ilanngullugu § 3, imm. 1-imi inerteqquteqarneq, 2) § 3, imm. 1-imi inerteqquteqarnermi ilaatinneqanngitsoq pillugu § 3, imm. 2 malillugu aalajangiinermik, imaluunniit taamatut aalajangiinermut atugassarititaasussamik malinninngitsoq, 3) Naalakkersuisut imaluunniit oqartussaasut allat nalunaarut manna malillugu paasissutissanik nalunaarfigineqartussaatillugit, eqqunngitsunik imaluunniit paatsuunganartunik paasissutissiisoq imaluunniit paasissutissanik tunniussinngitsoq. 4) § 1, imm. 2-mi taaneqartut angallatit il.il. § 3, imm. 1-imi unioqqutitsinermi atorneqarsimasut arsaarinnissutigineqarsinnaapput Kalaallit Nunaanni pinerluttulerinermik inatsisip maleruagassiai tunngavigalugit. Imm. 2. Aatsitassanut ikummatissanullu inatsimmi § 96, imm. 4-imi aamma 5-imi maleruagassat, taamatuttaaq atorneqassapput. Atuutilerfia

§ 5. Nalunaarut manna nalunaaruteqarnikkut atuutsilersinneqarpoq.(*) Namminersorlutik Oqartussat, ulloq 26. august 2010. Ove Karl Berthelsen / Jørn Skov Nielsen (* 26. august 2010 saqqummiunneqartoq) Namminersorlutik Oqartussat Imaneq 4 3900 Nuuk E-mail: nsninatsit@nanoq.gl Linkit iluaqutaasussat Kalaallit Nunaanni inatsisinut nalunaarutit Namminersorlutik Oqartussat inatsisinut toqqorsiviat Naalakkersuisut