Act No. 7 on equality between women and men
颁布于 2003-04-11 · 文本截至 2026-10-01
以研究形式发布的公开法律与官方指引，不构成法律、税务或金融建议。
研究内容本身以英文撰写。标题和标签已翻译，调查结果和引文未翻译。
关于这部法律
- 原标题
- Arnat angutillu naligiissitaanissaat pillugu Inatsisartut inatsisaat.
- 语言
- Greenlandic
- 类型
- 法令
- 组织
- European Union
- 国家
- 格陵兰
- 主题
- General
- 关键词
- human rights, equity, gender, enforcement/compliance, offences/penalties, data collection/reporting, labour
在哪里阅读
文本
所收录的法律原文，按条款排列。每个条款都有自己的链接。
§ 1. Inatsimmi siunertarineqarpoq arnat angutillu akornanni, tassa angerlarsimaffimmi inooqatigiinnermi aammalu inuiaqatigiinni suliani tamani naligiissitaanerup siuarsarneqarnissaa, aamma arnat angutillu assigiimmik naleqarnerat aallaavigalugu naligiimmik sunniuteqarnissaat periarfissaallu ilanngullugit. Inatsimmi siunertarineqartoq aammattaaq tassaavoq suiaassuseq pissutigalugu toqqaannartumik toqqaannanngitsumilluunniit assigiinngisitsisoqarnissaanik akiuinissaq. Suiaassuseq pissutigalugu assigiinngisitsinissamik inerteqqut
§ 2. Arnat angutillu pisortat ingerlatsiviisa aamma inuussutissarsiutigalugu suliffeqarfiit iluanni naligiimmik atugassaqartinneqassapput. Namminersortut suliffeqarfiutaasa pisussaaffii
§ 3. Namminersortut suliffeqarfiutaasa suliassaqarfimmik iluanni naligiissitaanissaq sulissutigissavaat, kiisalu tamanna pissutissaqaraangat pilersaarusiornerni ingerlatsinernilu naligiissitsineq ilaatissallugu. Imm. 2. Namminersortut suliffeqarfiutaat qulit sinnerlugit sulisoqartut sulisut suiaassutsimikkut agguataarsimanerat kiisalu ukiumi pineqartumi naligiissitaaneq siuarsarniarlugu sulisoqarnikkut ingerlatsinermi iliuutsit Naligiissitaanermut Naalakkersuisumut ukiut tamaasa nalunaarutigisassavaat. Nalunaarut 1. marts nallertinnagu tunniunneqartassaaq siullermik ukioq 2004-mut. Imm. 3. Naligiissitaanermut Naalakkersuisoq imm. 2 naapertorlugu nalunaaruteqartarneq pillugu erseqqinnerusunik malittarisassiorsinnaavoq. Pisortat oqartussaasut pisussaaffii
§ 4. Pisortat oqartussaasut suliassaqarfimmik iluanni naligiissitaanissaq sulissutigissavaat, kiisalu tamanna pissutissaqaraangat pilersaarusiornerni ingerlatsinernilu naligiissitsineq ilaatissallugu. Imm. 2. Pisortat ingerlatsivii aamma suliffeqarfii qulit sinnerlugit sulisoqartut sulisut suiaassutsimikkut agguataarsimanerat kiisalu ukiumi pineqartumi naligiissitaaneq siuarsarniarlugu sulisoqarnikkut ingerlatsinermi iliuutsit Naligiissitaanermut Naalakkersuisumut ukiut tamaasa nalunaarutigisassavaat. Nalunaarut 1. marts nallertinnagu tunniunneqartassaaq siullermik ukioq 2004-mut. Imm. 3. Naligiissitaanermut Naalakkersuisoq imm. 2 naapertorlugu nalunaaruteqartarneq pillugu erseqqinnerusunik malittarisassiorsinnaavoq. Ataatsimiititaliat siulersuisullu
§ 5. Pisortat ataatsimiititaliaat, isumalioqatigiissitaat assigisaallu inuiaqatigiinnut pingaarutilimmik malittarisassanik piareersaasussatut imaluunniit pilersaarusiortussatut Naalakkersuisunit pilersinneqartut angutinik arnanillu tamarmik sapinngisamik amerlaqatigiinnik ilaasortaqassapput.
§ 6. Siulersuisut, sinniisoqarfiit imaluunniit ataatsimoortumik siulersuiffiit taamatut ittut, Naalakkersusiut ilaasortaatitassanik toqqaavigisartagaat angutinik arnanillu tamarmik sapinngisamik amerlaqatigiinnik ilasortaqartassapput. Imm. 2. Imm. 1-imi aalajangersagaq suliffeqarfinnut imminnut pigisunut, soqutigisaqaqatigiiffinnut, aktiaateqarluni ingerlatseqatigiiffinnut aamma piginneqataassuteqarluni ingerlatseqatigiiffinnut pisortat ingerlatsineranni ilaasutut naatsorsuunneqarsinnaanngitsunut aamma atuuppoq, suliffeqarfinnut nammineq pigisunut taakkununnga aningaasartuutit annertunerpaatigut Nunatta Karsianit matuneqartarpata, imaluunniit ingerlatseqatigiiffiup annertunersaa Namminersornerullutik Oqartussanit pigineqarpat.
§ 7. Oqartussaasut, siulersuisut il.il. §§-ini 5-mi aamma 6-imi taaneqartutut ittut ataatsimiititaliani il.il. ilaasortamik ataatsimik siunnersuuteqartussat, tak. §§-it 5 aamma 6, angummik arnamillu siunnersuuteqassapput. Ilaasortat amerlanerusut siunnersuutigineqassappata arnat angutillu amerlaqatigiit siunnersuutigineqassapput. Kikkut ilaasortatut toqqagaanissaannik aalajangiiniarnerminni ataatsimiitaliat il.il., tak. §§-it 5 aamma 6, arnanik angutinillu amerlaqatigiinnik ilaasortaqartarnissaat Naalakkersuisut anguniassavaat. Imm. 2. Oqartussaasup siulersuisulluunniit il.il. imm. 1-imi aalajangersagaq saneqqussinnaavaat, taamaaliornissamut immikkut ittunik pissutissaqarpat, taamaaliussagunillu tamatumunnga tunngavilersuummik saqqummiussissallutik. Imm. 3. Oqartussaasut siulersuisullu il.il. imm. 1 naapertorlugu ilaasortassanik inassuteqan-ngippata, oqartussat siulersuisulluunniit pineqartut inassuteqaataat Naalakkersuisut naatsorsuutiginngitsoorsinnaavaat. Tamanna aamma atuuppoq imm. 1-imi aalajangersakkap sanioqqunnissaanut imm. 2 naapertorlugu tunngavilersuutaasoq Naalakkersuisut akuerisinnaanngippassuk.
§ 8. Naalakkersuisoqarfiit tamarmik immikkut siulersuisunut il.il. ilaasortassanik, tak. § 6, qinersisoqareernerit tamaasa siulersuisut il.il. § 6-imi pineqartunut ilaatinneqartut katitigaaneri pillugit naligiissitaanermut Naalakkersuisumut nalunaaruteqartassapput. Arnat angutillu sulinermut tunngatillugu naligiissitaanerat
§ 9. Sulisitsisup kialuunniit angutinik arnanillu sulisoqartup atorfinitsitsinerni, suliffimmi nuutsitsisarnerni, atorfimmi qaffatsitaanerni soraarsitsinernilu naligiimmik pisassavai, suliffimmilu naligiimmik atugassaqartissallugit. Imm. 2. Inatsit atorneqassanngilaq naligiimmik pinnittarnissaq ataatsimut isumaqatigiissutini tamatuma assinganik pisussaaffigineqarpat.
§ 10. Aningaasarsiaqarluni sulisuusumik, taassuma naartunera ernereernerulluunniit kingorna sulinngiffeqarnera pissutigalugit imaluunniit aningaasarsiaqarluni sulisuusumik, naartunermi, erninermi meeravissiartaarnermilu sulinngiffeqartarneq il.il. ullormusiaqartarnerlu pillugit Inatsisartut peqqussutaat naapertorlugu sulinngiffeqarnissamik piumasaqarsimasumik soraarsitsinissaq inerteqqutaavoq.
§ 11. Sulisitsisup kialuunniit angutinik arnanillu sulisoqartup inuussutissarsiornermi ilitsersorneqartarnermut, inuussutissarsiornermi ilinniartitaasarnermut, inuussutissarsiornermi pikkorissartarnernut, ingerlaqqiffiusumik ilinniagaqarnernut allanilu sungiusaqqittarnermut tunngatillugu naligiimmik pisassavai. Imm. 2. Naligiimmik pinnittarnissamik pisussaaffik aamma atuuppoq suliffeqarfinnut, inuussutissarsiornermi ilitsersuussisarnissamik ilinniartitsisarnissamillu imm. 1-imi taaneqartunik ingerlatsisunut tamanut.
§ 12. Atorfimmik inuttassarsiuinermi imaluunniit inuussutissarsiutinut ilinniartitsinissami il.il. nalunaarneqassanngilaq aalajangersimasumik suiaassusilik ujartorneqarnersoq salliutinneqassanersorluunniit. Arnat angutillu assigiimmik akissarsiaqartinneqarnerat
§ 13. Sulisitsisup kialuunniit arnat angutillu, sulianut assigiinnut imaluunniit sulianut assigiimmik naleqartinneqartunut naligiimmik akissarsiaqartissavai, aammattaaq akissarsiamikkut atugarisaat assigiississallugit. Imm. 2. Suliap naleqassusianik naliliineq piginnaasat naliliinermilu tunngaviusariaqartut allat ataatsimut nalilernerisigut pissaaq.
§ 14. Aningaasarsiaqarluni sulisuusup § 13-imut akerliusumik allanit appasinnerusunik akissarsiallip akissarsiat assigiinngissutaat piumasaqaatigisinnaavai.
§ 15. Sulisitsisup aningaasarsiaqarluni sulisuusoq, taassuma naligiimmik akissarsiaqarnissa-mik, aammalu akissarsiatigut assigiimmik atugaqarnissamik piumasaqarnera pissutigalugu soraarsissinnaanngilaa. Imm. 2. Soraarsitsinerup imm. 1-imi malittarisassat uniorlugit pisimannginnera sulisitsisup uppernarsagassaraa. Tamannali atuutissanngilaq aningaasarsiaqarluni sulisuusup naligiimmik akissarsiaqarnissamik piumasaqarneraniit ukioq ataaseq qaangiutereersoq soraarsitsisoqartillugu. Imm. 3. Soraarsitsineq imm. 1-imi malittarisassat uniorlugit pisimasoq, taamaattoqar- neraasoqareerneratigut atortinneqassanngilaq, tamannali immikkut pissutissaqartillugu illuatungeriit soqutigisaasa naliliiffigereernerisigut sulisitsinerup ingerlateqqinneqarnissaanik sulisitsinerulluunniit nanginneqaqqinnissaanik piumasaqarnissaq naapertuuttuusorinanngippat atuutissanngilaq. Tamatumunnga taarsiullugu aningaasarsiaqarluni sulisuusup soraarsitap taarsiivigineqarnissani piumasarisinnaavaa.
§ 16. Isumaqatigiissutini aningaasarsiaqarlutik sulisuusut assigiimmik akissarsiaqartitaaffiini, aamma akissarsiatigut assigiimmik atugassaqartitaaffiini, taamaattorli aningaasarsiaqarluni sulisuusumut suliffeqarfimmulluunniit naammaginartumik tunngavilersorneqanngitsunik soraarsitsinerni ajunngitsorsiassat pillugit malittarisassaqanngitsuni § 15 taamatulli atuutissaaq. Suliaq sulisartoqarnermi maleruagassanik aaqqissuussineq naapertorlugu suliarineqarsinnaavoq, taamaaliornissamut piumasaqaataasut aamma eqqortinneqarsimappata.
§ 17. Sulisitsisoq inatsit naapertorlugu naligiimmik akissarsiaqartitsisussaanerminik, aamma akissarsiatigut assigiimmik atugassaqartitsisussaanerminik naammassinninngippat aningaasarsiaqarluni sulisuusup piumasaqaat eqqartuussivitsigut aalajangersartissinnaavaa. Imm. 2. Arnat angutillu akissarsiaqarnikkut assigiinngisinneqarpata sulisitsisup pisussaaffigaa qularnarunnaarsissallugu suliap pineqartup assigiinngitsumik naleqarnera. Immikkut akuersisarneq
§ 18. Inuussutissarsiornermik ingerlatat ilinniartitaanerilluunniit ilaanni ingerlataqartup arnaanissaa angutaanissaaluunniit aalajangiisuutinneqarpat Naalakkersuisut, Naligiissitaanissamut Siunnersuisoqatigiit oqaaseqaateqartereerlugit, akuersissutigisinnaavaat §§-ini 9-mi, 11-12-milu aalajangersakkat sanioqqunneqarnissaat. Imm. 2. Immikkut ittunik pissutissaqartoqartillugu § 2-mi aalajangersakkat sanioqqunneqarnissaat Naalakkersuisut suliffeqarfimmut inuussutissarsiornermik ingerlatalimmut pisortalluunniit ingerlatsiviannut akuersissutigisinnaavaat. Imm. 3. Arnat angutillu naligiimmik periarfissaqarnissaat siuarsarniarlugu, pingaartumik suliffeqalernissamut, ilinnialernissamut il.il. assigiinngissutaasut qaangerniarlugit § 2-mik aamma §§ 9 - 12- imik sanioqqutitsilluni suliniuteqartoqarnissaa Naalakkersuisut akuerisinnaavaat. Taarsiissuteqartarneq
§ 19. Inuit § 2-p imaluunniit §§ 9-12-ip unioqqutinneqarnerisigut pisinnaatitaaffimmikkut innarliivigineqartut taarsiivigineqarsinnaapput.
§ 20. Aningaasarsiaqarluni sulisuusoq § 10-mut akerliusumik imaluunniit §§-it 9 aamma 11 naapertorlugit naligiimmik pineqarnissamik piumasaqarsimanera pissutigalugu soraarsitaappat sulisitsisoq taarsiissutinik akiliissaaq. Imm. 2. Imm. 1 naapertorlugu taarsiissutissat sapaatip akunnerini 39-ni akissarsiat sinnerlugit angissuseqarsinnaanngitsut, aningaasarsiaqarluni sulisuusup atorfeqarnerata sivisussusia suliamilu pissusiusut tunngavigalugit aalajangersarneqassapput. Sulisitsisup § 10-mik unioqqutitsineranut taarsiissutissat, aningaasarsiaqarluni sulisuusup piffissami atorfimmik soraarsinneqarfimmini sivisunerpaamik sulinngiffeqarsinnaaffiani aningaasarsianit ikinnerusinnaanngillat. Imm. 3. Taamatuttaaq imm. 1 aamma 2 atuutissapput ataatsimut isumaqatigiissutit naapertorlugit assigiimmik pinninnissamik pisussaaffeqarpat, isumaqatigiissummili aningaasarsiaqarluni sulisuusumut suliffeqarfimmulluunniit naammaginartumik tunngavilersorneqanngitsunik soraarsitsinermi pineqartoq taartisiassaqanngippat. Suliaq sulisartoqarnermi maleruagassanik aaqqissuussineq naapertorlugu suliarineqarsinnaavoq taamaaliornissamut piumasaqaataasut naammassineqarsimappata. Imm. 4. § 15, imm. 3 naapertorlugu taarsiissutigineqartut aningaasarsiaqarluni sulisuusup soraarsitaasimasup ukiumi kingullermi agguaqatigiissillugu akissarsiai naapertorlugit naatsorsorneqartussat sapaatip akunnerini 78-ini akissarsiat sinnersimassanngilaat, aningaasarsiaqarlunilu sulisuusup atorfeqarnerata sivisussusia suliamilu pissusiusut tunngavigalugit aalajangersarneqassallutik. Uppernarsaasiisussaaneq
§ 21. Inuk, § 2, §§ 9 - 13, § 15 aamma § 17, imm. 1 naapertorlugit unioqqutitsivigineqartutut imminut isigisoq pissusiviusunik toqqaannartumik toqqaannanngitsumilluunniit assigiinngisitsisoqarneranik ersersitsisunik takussutissippat, illua´tungiusup pisussaaffigaa naligiissumik pinnittussaanermik tunngaviusup unioqqutinneqarsimannginneranik uppernarsaanissaq. Imm. 2. Sulinermik inuussutissarsiuteqartoq soraarsitaappat, § 10 takuuk, naartunerminik sulisitsisuminut ilisimatitsissuteqareernermigut sulisitsisup uppernarsassavaa soraarsitsineq naartunermik pissuteqanngitsoq. Atuussinnaassuseqannginneq il.il.
§ 22. Isumaqatigiissutini aalajangersakkat suliffeqarfinnilu malittarisassat il.il. §§ 9 - 11-mi, 13-imi aamma §§ 15 - 17-imi allassimasunut akerliusut atuussinnaassuseqanngillat. Taamanna aamma atuuppoq namminersorlutik inuussutissarsiortunut malittarisassani aalajangersarneqarsimasunut il.il. Imm. 2. Aammattaaq isumaqatigiissutini aalajangersakkat suliffeqarfinnilu malittarisassat il.il. sulisitsisumut ataasiinnaanngitsumut atuuttut, §§ 9 - 11-mi, § 13-imi aamma § 15 - 17-imi taagorneqartut iluini angutinik arnanillu assigiinngisitsiviusut atuussinnaassuseqanngillat. Tamanna aamma atuuppoq namminersorlutik inuussutissarsiortunut malittarisassani aalajangersarneqarsimasunut il.il.
§ 23. Aningaasarsiaqarluni sulisuusup inatsit naapertorlugu pisinnaatitaaffini iperaannarsinnaanngilai. Pinerluttulerinermi inatsisitigut pineqaatissiisinnaanerit
§ 24. §§ 9 - 12-imik unioqqutitsisut akiliisitaasussanngorlugit eqqartuunneqarsinnaapput. Imm. 2. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiilluni ingerlatseqatigiiffik assigisaalluunniit unioqqutitsippat pineqartuni inatsisitigut inummut naligititaasoq akiliisitaanissamut akisussaatinneqarnissamik pisussaaffilerneqarsinnaavoq. Namminersornerullutik Oqartussat, kommuni kommunilluunniit suleqatigiiffiat, kommunalbestyrelsit nunaqarfinnilu aqutsisut il.il. pillugit Inatsisartut inatsisaanni § 64-imi ilaatinneqartut arlaat unioqqutitsippat, Namminersornerullutik Oqartussat, kommunalbestyrelsi imaluunniit kommunit suleqatigiiffiat akiliissitaanissamut akisussaatinneqarnissamik pisussaaffilerneqarsinnaavoq. Atuutilersitsinermik atorunnaarsitsinernillu aalajangersakkat
§ 25. Inatsit 1. maj 2003-mi atuutilerpoq. Imm. 2. Inatsisit aalajangersakkallu tulliuttut atorunnaarsinneqarput: 1) Arnat angutillu assigiimmik akissaateqartinneqarnerat pillugu inatsit nr. 32, 4. februar 1976-imeersoq. 2) Sulinermi erninermullu atatillugu sulinngiffeqarnermi il.il. angutit arnallu assigiimmik pineqarnissaat pillugu inatsit nr. 244, 19. april 1989-imeersoq. 3) Naartunermi, erninermi meeravissiartaarnermilu sulinngiffeqartarneq il.il. ullormusiaqartarnerlu pillugit Inatsisartut peqqussutaanni nr. 12-imi, 31. oktober 1996-imeersumi § 4. Namminersornerullutik Oqartussat, ulloq 11. april 2003 Hans Enoksen / Finn Karlsen Namminersorlutik Oqartussat Imaneq 4 3900 Nuuk E-mail: nsninatsit@nanoq.gl Linkit iluaqutaasussat Kalaallit Nunaanni inatsisinut nalunaarutit Namminersorlutik Oqartussat inatsisinut toqqorsiviat Naalakkersuisut