Regulation No. 221 dated 20.2.2013 establishing the green zones in the city of Tirana and its suburbs

VENDIM Nr. 221, datë 20.2.2013 PËR CAKTIMIN E ZONAVE TË BREZIT TË GJELBËR TË QYTETIT TË TIRANËS DHE TË RRETHINAVE TË TIJ Në mbështetje të nenit 100 të Kushtetutës, të neneve 3, 20/3 dhe 23 të ligjit nr. 10 431, datë 9.6.2001 “Për mbrojtjen e mjedisit” dhe të pikës 4 të nenit 27 të ligjit nr. 10 119, datë 23.4.2009 “Për planifikimin e territorit”, të ndryshuar, me propozimin e Ministrit të Mjedisit, Pyjeve dhe Administrimit të Ujërave, Këshilli i Ministrave VENDOSI: 1. Caktimin e zonave për krijimin e brezit të gjelbër të qytetit të Tiranës dhe të rrethinave të tij, sipas hartës bashkëlidhur këtij vendimi. 2. Zonat që përbëjnë brezin e gjelbër kanë një sipërfaqe të përgjithshme prej 4 233.1 (katër mijë e dyqind e tridhjetë e tre pikë një) ha, të ndarë si më poshtë vijon: Zonat e brezit të gjelbër të Tiranës Nr. Emërtimi Sipërfaqja ha 1 Liqeni i Tiranës 237.1 2 Sauk-Lundër 825.1 3 Lundër-Mullet 209.7 4 Liqeni i Farkës 296.8 5 Mullet-Farkë 1,311.0 6 Zall-Herr 437.8 7 Liqeni i Paskuqanit 267.3 8 Brar-Linzë 364.1 9 Linzë 110.9 10 Mëzez-Kashar 173.3 TOTALI 4,233.1 3. Kufijtë e zonave të brezit të gjelbër të qytetit të Tiranës dhe të rrethinave të tij përshkruhen në shtojcën bashkëlidhur këtij vendimi. 4. Brezi i gjelbër krijohet në nivel qarku, bashkie dhe komune, duke përcaktuar sipërfaqen, sipas zonave, që synohet të shpallet brez i gjelbër, kufijtë dhe shkallën e ruajtjes së tij, sipas zonimit të territorit. 5. Institucionet qendrore e vendore dhe çdo organ tjetër publik ka detyrë e përgjegjësi për planifikimin e territorit dhe kontrollin mjedisor të brezit të gjelbër, sipas legjislacionit në fuqi. 6. Agjencia Kombëtare e Planifikimit të Territorit (AKPT), në bashkëpunim me autoritetet e planifikimit të çdo niveli, duhet të kontrollojë zbatimin dhe përputhshmërinë e këtij vendimi me të gjitha instrumentet e planifikimit vendor dhe kombëtar, të cilat do të hartohen në të ardhmen për zonat e brezit të gjelbër. 7. Në rregulloren e planifikimit të territorit, ndarja e sipërfaqes së brezit të gjelbër në nënzona përdorimi të bazohet në rëndësinë e vlerave të veçanta natyrore, të llojeve floristike e faunistike, të tokës bujqësore, pyjeve, kullotave, zonave të mbrojtura dhe monumenteve natyrore, të peizazhit dhe karakteristikave unike gjeografike, liqeneve, ujëmbledhësve, lumenjve e përrenjve, të vlerave historike, kulturore, arkeologjike e monumentale dhe të trashëgimisë natyrore e kulturore të zhvillimeve urbane, shërbimeve mbështetëse dhe krijimit të kushteve për zhvillimin e veprimtarive rekreative, çlodhëse, argëtuese, sportive dhe ekoturistike. 8. Në planifikimin e territorit, sipas specifikave të çdo zone të brezit të gjelbër, të përcaktohen: kategoritë dhe strukturat e lejuara, të kushtëzuara, të ndaluara, kushtet dhe normat e përdorimit të tyre brenda secilës zonë të brezit të gjelbër; llojet e punimeve, të veprimtarive, të shërbimeve dhe të pritjes e të argëtimit të vizitorëve; kushtet e sigurisë së jetës publike dhe të përshtatshmërisë për lëvizje për personat madhorë, me aftësi të kufizuar dhe kategori të tjera; nënzonat e veçanta pa ndërtime, por vetëm për shëtitjet në natyrë të lirë dhe të strukturave përkatëse, si shtigjet, stolat, belvedere, çezma, nyje sanitare etj., në shërbim të vizitorëve; nënzonat e veçanta e të kufizuara për ngritjen e strukturave të shërbimeve mbështetëse, shëndetësore e të nyjave sanitare, të tregtisë dhe të biznesit; nënzonat e kufizuara për parkimin e çdo lloj automjeti; nënzonat e veçanta për argëtim dhe veprimtari sportive; veprimtaritë dhe ndërtimet e çfarëdolloji, që kanë ndikim të ndjeshëm në mjedis dhe që nuk janë në përputhje me qëllimin dhe funksionimin e zonave të brezit të gjelbër, të cilat duhet të pezullohen e të prishen; planifikimi dhe administrimi i territorit për sipërfaqet e tokave, sipas përcaktimeve të ligjit nr. 8752, datë 26.3.2001 “Për krijimin dhe funksionimin e strukturave për administrimin dhe mbrojtjen e tokës”, të ndryshuar; masat për rehabilitimin e digave dhe të pasqyrës ujëmbledhëse të liqeneve/rezervuarëve, për të rritur sigurinë dhe kthimin e tyre në mjedise çlodhëse, argëtuese, sportive dhe të peshkimit sportiv; masat për rigjallërimin e pyjeve, të ripyllëzimit me lloje vendase dhe dekorative, në përputhje me funksionet e brezit, të pranueshme për peizazhin dhe të pëlqyer nga banorët dhe vizitorët; masat që duhet të merren për rehabilitimin e mjedisit natyror të dëmtuar dhe ndaj erozionit. 9. Studimi dhe rregulloret për zhvillimin e brezit të gjelbër miratohen nga Këshilli Kombëtar i Territorit (KKT). 10. Inspektorati Ndërtimor Urbanistik Kombëtar (INUK) dhe strukturat inspektuese të ministrive dhe të institucioneve vendore, sipas përkatësisë dhe kompetencave ligjore, në fuqi, ushtrojnë kontrolle për miradministrimin e brezit të gjelbër të qytetit të Tiranës dhe të rrethinave të tij, si dhe për zbatimin e planit të zhvillimit. 11. Ngarkohen institucionet qendrore, Këshilli i Qarkut, njësitë e qeverisjes vendore dhe strukturat inspektuese për zbatimin e këtij vendimi. Ky vendim hyn në fuqi pas botimit në Fletoren Zyrtare. KRYEMINISTRI Sali Berisha