Law No. 77/2013 amending and supplementing Law No. 9048 dated 7 April 2003 on cultural heritage

LIGJ Nr. 77/2013 PËR DISA SHTESA DHE NDRYSHIME NË LIGJIN NR. 9048, DATË 7.4.2003 “PËR TRASHËGIMINË KULTURORE”, TË NDRYSHUAR Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave, KUVENDI I REPUBLIKËS SË SHQIPËRISË VENDOSI: Në ligjin nr. 9048, datë 7.4.2003 “Për trashëgiminë kulturore”, të ndryshuar, bëhen këto shtesa dhe ndryshime: Neni 1 Në nenin 3, pas pikës 35 shtohet pika 36 me këtë përmbajtje: “36. “Inspektim” është çdo formë kontrolli, e bërë me qëllim verifikimin e respektimit të kërkesave ligjore, sipas këtij ligji.”. Neni 2 Pas nenit 8 shtohet neni 8/1 me këtë përmbajtje: “Neni 8/1 Inspektimi Kontrolli për verifikimin e respektimit të kërkesave ligjore, sipas këtij ligji, bëhet nga inspektorati shtetëror që mbulon fushën e trashëgimisë kulturore. Organizimi dhe funksionimi i inspektoratit përcaktohen me vendim të Këshillit të Ministrave, në përputhje me ligjin nr. 10 433, datë 16.6.2011 “Për inspektimin në Republikën e Shqipërisë””. Neni 3 Në nenin 15 fjalët “Institucionet shtetërore të specializuara” zëvendësohen me fjalët “Inspektorati shtetëror që mbulon fushën e trashëgimisë kulturore” dhe fjalët “institucionet e mësipërme” zëvendësohen me fjalët “inspektorati shtetëror”. Neni 4 Në nenin 34, pas fjalëve “institucionet shtetërore të specializuara” shtohen fjalët “dhe Inspektoratin shtetëror që mbulon fushën e trashëgimisë kulturore”. Neni 5 Në nenin 49 pika 1 paragrafi i parë, para fjalëve “me gjobë” shtohen fjalët “me dënim kryesor”. Neni 6 Në nenin 50, pikat 1, 2 dhe 3 ndryshohen si më poshtë: “1. Të drejtën e vënies së gjobës e kanë inspektorët e inspektoratit shtetëror që mbulon fushën e trashëgimisë kulturore. 2. Shqyrtimi i kundërvajtjes administrative, marrja e vendimit dhe ankimi bëhen në përputhje me ligjin për inspektimin. 3. Kundërvajtësi duhet ta paguajë gjobën brenda 30 ditëve nga data kur vendimi bëhet i ekzekutueshëm. Në rast mospagimi të gjobës brenda afatit të mësipërm, zbatohet legjislacioni në fuqi për kundërvajtjet administrative.”. Neni 7 Dispozitë kalimtare Organi ekzistues inspektues vazhdon të ushtrojë funksionin e vet sipas organizimit aktual deri në krijimin e organit të ri, sikurse parashikohet në ndryshimet e bëra në këtë ligj. Neni 8 Ky ligj hyn në fuqi 15 ditë pas botimit në Fletoren Zyrtare. Miratuar në datën 14.2.2013 Shpallur me dekretin nr. 8036, datë 1.3.2013 të Presidentit të Republikës së Shqipërisë, Bujar Nishani