Law No. 18/2013 amending and supplementing Law No. 8681 on the design, construction, use and maintenance of dams and barrages

LIGJ Nr. 18/2013 PËR DISA SHTESA DHE NDRYSHIME NË LIGJIN NR. 8681, DATË 2.11.2000 “PËR PROJEKTIMIN, NDËRTIMIN, SHFRYTËZIMIN DHE MIRËMBAJTJEN E DIGAVE DHE DAMBAVE” Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave, KUVENDI I REPUBLIKËS SË SHQIPËRISË VENDOSI: Në ligjin nr. 8681, datë 2.11.2000 “Për projektimin, ndërtimin, shfrytëzimin dhe mirëmbajtjen e digave dhe dambave”, bëhen këto shtesa dhe ndryshime: Neni 1 Pas nenit 4 shtohet neni 4/1 me këtë përmbajtje: “Neni 4/1 Inspektimi Inspektimi për verifikimin e respektimit të kërkesave ligjore, sipas këtij ligji, bëhet në përputhje me këtë ligj dhe ligjin nr. 10 433, datë 16.6.2011 “Për inspektimin në Republikën e Shqipërisë”.”. Neni 2 Neni 11 ndryshohet si më poshtë: “Neni 11 Sanksione Përveç detyrimeve që përmbajnë këto dispozita, shkelje dhe kryerje të veprimeve të kundërligjshme, të cilat përbëjnë kundërvajtje në fushën e digave/dambave, dënohen me dënim kryesor me gjobë: a) për nenin 6, me shumën 500 000 lekë; b) për nenet 5 dhe 9, me shumën 100 000 lekë. Gjobat vendosen nga Inspektorati Teknik i Digave/Dambave. Krahas dënimit kryesor, inspektori ka të drejtë të marrë masa urgjente në përputhje me ligjin për inspektimin.”. Neni 3 Neni 12 ndryshohet si më poshtë: “Neni 12 Kundër vendimit të Inspektoratit Teknik të Digave/Dambave mund të bëhet ankim te KKDM-ja, sipas Kodit të Procedurave Administrative. Kundër vendimit të KKDM-së mund të bëhet ankim në përputhje me ligjin për inspektimin. Ekzekutimi i këtyre gjobave bëhet sipas legjislacionit në fuqi për kundërvajtjet administrative. Gjobat paguhen në zyrën e financës së organit të kontrollit.”. Neni 4 Dispozitë kalimtare Organi ekzistues inspektues vazhdon të ushtrojë funksionin e vet sipas organizimit aktual deri në krijimin e organit të ri, sikurse parashikohet në ndryshimet e bëra në këtë ligj. Neni 5 Ky ligj hyn në fuqi 15 ditë pas botimit në Fletoren Zyrtare. Miratuar në datën 14.2.2013 Shpallur me dekretin nr. 7977, datë 1.3.2013 të Presidentit të Republikës së Shqipërisë, Bujar Nishani