Regulation on the form and content of the request for registration in the register of importers of certain agricultural products, as well as the necessary documentation for determining the fulfillment of the conditions for import

МИНИСТЕРСТВО ЗА ЗЕМЈОДЕЛСТВО, ШУМАРСТВО И ВОДОСТОПАНСТВО Врз основа на член 36-а став (2) од Законот за земјоделство и рурален развој {,,Службен весник на Република Македонија" бр. 49/10, 53/11, 126/12, 15/13, 69/13, 106/13, 177 /14, 25/15, 73/15, 83/15, 154/15, 11/16, 53/16, 120/16, 163/16, 74/17 и 83/18), министерот за земјоделство, шумарство и водостопанство донесе ПРАВИЛНИК ЗА ФОРМАТА И СОДРЖИНАТА НА БАРАЊЕТО ЗА ЗАПИШУВАЊЕ ВО РЕГИСТАРОТ НА УВОЗНИЦИ НА ОДДЕЛНИ ЗЕМЈОДЕЛСКИ ПРОИЗВОДИ КАКО И ПОТРЕБНАТА ДОКУМЕНТАЦИЈА ЗА УТВРДУВАЊЕ НА ИСПОЛНЕТОСТА НА УСЛОВИТЕ ЗА УВОЗ Член 1 Со овој правилник се пропишува формата и содржината на барањето за запишување во Регистарот на увозници на одделни земјоделски производи како и потребната документација за утврдување на исполнетоста на условите за увоз. Член 2 Барањето за запишување во Регистарот на увозници на одделни земјоделски производи се издава на хартија во бела боја во А-4 формат и содржи два листа. Формата и содржината на барањето од став 1 на овој член се дадени во Прилог кој е составен дел на овој правилник. Член 3 За запишување во Регистарот на увозници на одделни земјоделски производи и заради утврдување на исполнетоста на условите за увоз кон барањето од член 2 на овој правилник се поднесува следната документација: 1. Документ за тековна состојба и доказ дека не е отворена постапка за ликвидација или стечајна постапка од Централен Регистар на Република Македонија; 2. Решение за регистрирање во Регистарот на објекти и оператори со храна од Агенција за храна и ветеринарство; 3. Образец Ml/M2 за вработени лица во редовен работен однос на неопределено работно време или потврда од Агенција за вработување; 4. Склучени договори за продажба на увезените земјоделски производи доколку увозот не се врши заради преработка за сопствени потреби; 5. Записник од Државен инспекторат за земјоделство за докажување на условот дека увозникот располага со соодветни објекти и опрема согласно актот со кој се пропишуваат услови кои треба да ги исполнуваат увозниците на одделни земјоделски производи; 6. Документ за расположливи финансиски средства и намирени обврски за откуп на земјоделски производи доколку е регистриран за вршење на соодветна дејност откуп и преработка на земјоделски производи и тоа: писмо на интерес од деловна банка за докажување на расположливи финансиски средства за откуп за тековната година или информација за економско финансиска состојба издадена од Централен Регистар на Република Македонија или ревизорски извештај од независна ревизорска куќа доколку има законска обврска за работењето во претходната година; 7. Договор за вршење на анализи на квалитетот со соодветна лабораторија или Државната фитосанитарна лабораторија за време на најавениот период на увоз доколку нема сопствена лабораторија. Член 4 Со денот на влегувањето во сила на овој правилник престанува да важи Правилникот за образецот на барањето за упис во Регистарот на откупувачи и Регистарот на увозници на одделни земјоделски производи и потребната придружна документација (,,Службен весник на Република Македонија" бр.102/10, 144/10, 156/11, 40/13, 138/13 и 52/14). Член 5 Овој правилник влегува во сила наредниот ден од денот на објавувањето во „Службен весник на Република Македонија". Бр. 14-6099 /5 8 јуни 2018 година Скопје Министер за земјоделство, шумарство и водостопанство, Љупчо Николовски, с.р.