Regulation No. 198 amending Regulation No. 320 of 2008 on the identification system for animals and livestock farms

VENDIM Nr.198, datë 19.2.2009 PËR DISA NDRYSHIME NË VENDIMIN NR.320, DATË 19.3.2008 TË KËSHILLIT TË MINISTRAVE “PËR SISTEMIN E IDENTIFIKIMIT TË KAFSHËVE DHE TË REGJISTRIMIT TË FERMAVE BLEGTORALE” Në mbështetje të nenit 100 të Kushtetutës, të neneve 3, pikat 6, 7, 38 e 39, 24 shkronja “b”, e 32, pika 6 të ligjit nr.9308, datë 4.11.2004 “Për Shërbimin dhe Inspektoratin Veterinar”, dhe të nenit 4 të ligjit nr.8702, datë 1.12.2000 “Për identifikimin e kafshëve dhe regjistrimin e fermave blegtorale”, me propozimin e Ministrit të Bujqësisë, Ushqimit dhe Mbrojtjes së Konsumatorit, Këshilli i Ministrave VENDOSI: 1. Në vendimin nr.320, datë 19.3.2008 të Këshillit të Ministrave, të bëhen këto ndryshime: a) Pika 4 ndryshohet, si më poshtë vijon: “4.Kostoja financiare e sistemit të identifikimit të kafshëve dhe të regjistrimit të fermave blegtorale, për pagesën e bazës materiale dhe për pagesën për shërbimin e kryer nga operatorët privatë, mbulohet nga buxheti i vitit 2009, miratuar për Ministrinë e Bujqësisë, Ushqimit dhe Mbrojtjes së Konsumatorit, për sistemin e identifikimit të kafshëve.”. b) Pika 5 ndryshohet, si më poshtë vijon: “5.Pagesa për operatorët privatë bëhet nga buxheti i matrikullimit, planifikuar për vitin 2009, nga Ministria e Bujqësisë, Ushqimit dhe Mbrojtjes së Konsumatorit, për drejtoritë rajonale të bujqësisë, ushqimit dhe mbrojtjes së konsumatorit, në qarqe, si më poshtë vijon: a) Për gjedhin, 100 (njëqind) lekë, për çdo kafshë të matrikulluar; b) Për bagëtitë e imëta, 30 (tridhjetë) lekë, për çdo kafshë të matrikulluar me matrikull individual, dhe 15 (pesëmbëdhjetë) lekë për krerë, për matrikullimin e kafshëve të reja, me destinacion për therje. Në shërbimin e kryer nga operatori privat përfshihen matrikullimi i kafshës dhe plotësimi e dorëzimi i formularëve respektivë, në drejtoritë rajonale të bujqësisë, ushqimit dhe mbrojtjes së konsumatorit, ku është i kontratuar.”. 2. Ngarkohen Ministria e Bujqësisë, Ushqimit dhe Mbrojtjes së Konsumatorit, Ministria e Financave, Ministria e Brendshme dhe Ministria e Mjedisit, Pyjeve dhe Administrimit të Ujërave për zbatimin e këtij vendimi. Ky vendim hyn në fuqi pas botimit në Fletoren Zyrtare. KRYEMINISTRI Sali Berisha