Regulation No. 18 laying down the criteria for selecting the sectors to be supported and the measures for benefiting from the agricultural and rural development fund

VENDIM Nr.18, datë 7.1.2009 PËR PËRCAKTIMIN E KRITEREVE BAZË, TË SEKTORËVE, QË DO TË MBËSHTETEN, DHE TË MASAVE TË PËRFITIMIT NGA FONDI I PROGRAMIT PËR BUJQËSINË DHE ZHVILLIMIN RURAL Në mbështetje të nenit 100 të Kushtetutës, të pikës 3 të nenit 6 të ligjit nr.9817, datë 22.10.2007 “Për bujqësinë dhe zhvillimin rural”, dhe të ligjit nr.10025, datë 27.11.2008 “Për buxhetin e vitit 2009”, me propozimin e Ministrit të Bujqësisë, Ushqimit dhe Mbrojtjes së Konsumatorit, Këshilli i Ministrave VENDOSI: 1. Fondet e miratuara në buxhetin e vitit 2009, për Ministrinë e Bujqësisë, Ushqimit dhe Mbrojtjes së Konsumatorit, zëri “Transfertë në buxhetet familjare”, të përdoren për mbështetjen e prodhimit bujqësor, blegtoral dhe të agropërpunimit. 2. Kriteret bazë për përdorimin e fondit të programit për bujqësinë dhe zhvillimin rural të jenë: a) Efiçenca ekonomike; b) Efektiviteti; c) Nxitja e punës në grup e përfituesve; ç) Bashkëfinancimi nga përfituesit; d) Nxitja e investimeve në blloqe nga shumë përfitues; dh) Masa e kontrollit për procesin e zbatimit të programit; e) Aksesi në treg i përfituesve nga programi; ë) Orientimi i masave, sipas rajonizimeve bujqësore. 3. Sektorët që mbështeten nga fondi i programit për bujqësinë dhe zhvillimin rural, të jenë: a) Prodhimi i frutave, ullinjve dhe rrushit; b) Prodhimi i perimeve; c) Prodhimi i qumështit dhe i mishit; ç) Përpunimi i frutave dhe i rrushit; d) Përpunimi i perimeve; dh) Prodhimi i mjaltit; e) Ruajtja dhe tregtimi i frutave dhe i perimeve; ë) Prodhimi i produkteve organike; f) Infrastruktura fizike e fermës. 4. Masat e përfitimit të drejtpërdrejtë nga fondi i programit për bujqësinë dhe zhvillimin rural të jenë për: a) mbjelljen e pemëve frutore, (mollë, dardhë, kumbull, qershi, pjeshkë, lajthi, luleshtrydhe) ullinjve dhe agrumeve në bllok, jo më pak se 4 dynym për fermerë individualë dhe jo më pak se 1 ha për grup fermerësh, 50% e vlerës së projektit, por jo më shumë se 400 000 (katërqind mijë) lekë/ha; b) mbjelljen e vreshtave në bllok, jo më pak se 5 dynym për fermerë individualë dhe jo më pak se 1 ha për grup fermerësh, 50% e vlerës së projektit, por jo më shumë se 600 000 (gjashtëqind mijë) lekë/ha; c) ujitjen me pika në pemëtore, agrumishte dhe ullishte intensive, 50% e vlerës së projektit, por jo më shumë se 300 000 (treqind mijë) lekë/ha; ç) mbrojtjen e ullishtave nga miza e ullirit, 20 000 (njëzet mijë) lekë/ha. d) certifikimin e produkteve bujqësore bio nga bimët e kultivuara, përkatësisht: i) për prodhimet e destinuara për tregun e brendshëm, jo më shumë se 50% e kostos, por asnjëherë më shumë se 20 000 (njëzet mijë) lekë/fermë; ii) për prodhimet për eksport, 50% e kostos së certifikimit, por jo më shumë se 70 000 (shtatëdhjetë mijë) lekë/fermë/vit; dh) prodhimin e fidanëve për llojet autoktone të rrushit: “Kallmet”, “Debinë” dhe “Vlosh”, “Pulës”, për fidanishte, për sipërfaqe jo më pak se 3 dynym, 1 200 000 (një milion e dyqind mijë) lekë/ha; e) ndërtimin e puseve për vaditje në pemëtore, agrumishte dhe ullishte, 50% e vlerës së projektit, por jo më shumë se 100 000 (njëqind mijë) lekë për pus; ë) blerjen e plastmasit për serra të reja diellore, me madhësi 2 dynym e lart, 300 000 (treqind mijë) lekë/ha serrë; f) serrat me ngrohje teknike, për prodhimin e perimeve, për ndryshimin e sistemit të përdorimit të lëndës djegëse nga naftë në solar, 1 500 000 (një milion e pesëqind mijë) lekë/ha; g) për prodhimin e kërpudhave, 50 për qind e vlerës së pajisjeve dhe instalimeve, por jo më shumë se 500 (pesëqind) mijë lekë për fermë; gj) pagesën, me 10 000 (dhjetë mijë) lekë për kokë, për fermat blegtorale, që mbarështojnë mbi 10 krerë lopë qumështi, por jo më shumë se për 30 krerë. Përfitojnë vetëm fermerët, që e dokumentojnë me faturë shitjen e qumështit; h) pagesën 500 (pesëqind) lekë për kokë dele, për tufat mbi 50 krerë dele, të matrikulluara. Përfitojnë vetëm fermerët, që dokumentojnë me faturë shitjen e qumështit. i) pagesën për koshere blete, 500 (pesëqind) lekë për koshere, për fermerë me mbi 50 koshere; j) mbarështimin intensiv të kërmillit, 50 për qind të vlerës së rasatit për ha, por jo më shumë se 500 (pesëqind) mijë për ha; k) prodhimin e vajit të ullirit extravergine, 100 (një qind) lekë/litër; l) mbështetjen, përmes subvencionimit, të normës së interesit për kreditë, që do të merren për veprimtaritë bujqësore ose agropërpunuese, si dhe për kreditë e marra gjatë vitit 2008 nga shoqëri, që ruajnë dhe përpunojnë produkte bujqësore, e grupet apo shoqëritë e prodhimit dhe të tregtimit në bujqësi, të regjistruara në mbështetje të ligjit nr.8088, datë 21.3.1996 “Për shoqëritë e bashkëpunimit reciprok”, deri në 2 000 000 (dy milionë) lekë, por jo më shumë se 50% të interesit, por jo më shumë se 3 vjet radhazi. 5. Procedura dhe mënyra e administrimit të fondit të programit përcaktohen me udhëzim të përbashkët të Ministrit të Financave dhe të Ministrit të Bujqësisë, Ushqimit dhe Mbrojtjes së Konsumatorit. 6. Ngarkohen Ministria e Bujqësisë, Ushqimit dhe Mbrojtjes së Konsumatorit dhe Ministria e Financave për zbatimin e këtij vendimi. Ky vendim hyn në fuqi pas botimit në Fletoren Zyrtare. KRYEMINISTRI Sali Berisha