Regulation No. 129 date 31.10.2015 amending the rules of certification of the operator of natural gas transmission system

VENDIM Nr. 129, datë 31.10.2015 MBI DISA NDRYSHIME NË RREGULLAT PËR CERTIFIKIMIN E OPERATORIT TË SISTEMIT TË TRANSMETIMIT TË GAZIT NATYROR Bazuar në neni 38 pika 2, të ligjit nr. 102/2015, “Për sektorin e gazit natyror”, Traktatit të Komunitetit të Energjisë, të ratifikuar me ligjin nr. 9051, datë 3.4.2006, vendimit të Këshillit Ministerial nr. D/2011/02/MC-EnC, si dhe në përputhje me direktivën 2009/73-EC dhe rregulloren EC nr. 715/2009, bordi i ERE-s, në mbledhjen e tij të datës 31.10.2015, mbasi shqyrtoi relacionin e përgatitur nga grupi i punës për disa ndryshime në rregullat e certifikimit të operatorit të sistemit të transmetimit të gazit natyror, VENDOSI: 1. Miratimin e disa ndryshimeve në Rregullat për Certifikimin e Operatorit të Sistemit të Transmetimit të Gazit Natyror (bashkëlidhur rregullat me ndryshimet sipas këtij vendimi). 2. Drejtoria Juridike dhe e Mbrojtjes së Konsumatorit të njoftojë të interesuarit për vendimin e Bordit të ERE-s. Ky vendim hyn në fuqi menjëherë. Ky vendim botohet në Fletoren Zyrtare. KRYETARI I ERE-S Petrit Ahmeti TEKSTI ME NDRYSHIMET NË RREGULLAT PËR CERTIFIKIMIN E OPERATORIT TË SISTEMIT TË TRANSMETIMIT PËR GAZIN NATYROR Në nenin 1, “Autoriteti”, fjalët: “nenit 9 të ligjit nr. 9946, datë 30.6.2008” janë zëvendësuar me fjalët: “nenit 37 të ligjit nr. 102/2015”. Në nenin 4 “Zbatimi dhe interpretimi i rregullores”, në pikën 2, pas fjalëve “Rregullorja duhet të zbatohet dhe interpretohet në përputhje me…” janë shtuar fjalët “Ligjin nr. 102/2015 “Për sektorin e gazit natyror””. Në nenin 5 “Përkufizimet”, fjalët “këtë rregullore” janë zëvendësuar me “nenin 4 të ligjit nr. 102/2015 “Për sektorin e gazit natyror””. Në nenin 5, pika 2, pas fjalëve “i cili funksionon në përputhje me ligjin” janë shtuar fjalët “për sektorin”. Në nenin 5, pika 4, në fund të fjalisë janë shtuar fjalët: “si dhe për garantimin e mundësive afatgjata të sistemit për të përmbushur kërkesat e arsyeshme për transportin e gazit…” Në nenin 6 “Detyrimet për certifikimin” në pikën 1 fjalët “Ligjin për gazin natyror” janë zëvendësuar me fjalët “në ligjin nr. 102/2015 “Për sektorin e gazit natyror”. Në nenin 6, pika 2, pas fjalës “Ligjin” janë shtuar fjalët “nr. 102/2015 “Për sektorin e gazit””. Në nenin 10 “Procedurat që aplikohen për certifikim”, në pikën 1 fjalët “në procedurat e vendosura në këtë rregullore” janë zëvendësuar me fjalët: “në ligjin nr. 102/2015 “Për sektorin e gazit natyror”, si dhe”. Në nenin 11 “Vendimi për certifikimin” në pikën 1, fjalët “nga data e marrjes së aplikimit dhe paraqitjes siç duhet të të gjitha dokumenteve të dhënave dhe informacionit” janë zëvendësuar me fjalët “nga data e aplikimit dhe dorëzimit të të gjithë dokumentacionit dhe informacionit të kërkuar nga OST-ja”. Në nenin 11 pika 2 fjalët “I dhënë bazuar në vendimin e nënkuptuar nga ERE” zëvendësohen me fjalët “jepet i miratuar në heshtje nga ERE”. Në nenin 11, pika 6, është riformuluar: “Nëse vendimi i ERES-s është i ndryshëm nga rekomandimet e Sekretariatit, ERE duhet të publikojë dhe të arsyetojë shkaqet e mospranimit të tyre, duke informuar Sekretariatin për këtë vendim”. Në nenin 12 “Certifikimi në lidhje me vendet e treta”, fjalët “Neni 8 i Rregullores, duke marrë në konsideratë kërkesat e veçanta të përcaktuara në këtë rregullore” janë zëvendësuar me fjalët “Nenit 40 të ligjit nr. 102/2015 “Për sektorin e gazit natyror””. Në nenin 13 “Rihapja e procedurës së certifikimit” në pikën 1 fjalët “të saj” janë zëvendësuar me fjalët “që i njeh ligji 102/2015 “Për sektorin e gazit natyror””.