Decision No.1197 dated 3.12.2009 proclaiming the Tirana Castle Archaeological Zone “A” and approving the regulation of its administration

VENDIM Nr.1197, datë 3.12.2009 PËR SHPALLJEN E KALASË SË TIRANËS “ZONË ARKEOLOGJIKE “A”” DHE MIRATIMIN E RREGULLORES SË ADMINISTRIMIT TË SAJ Në mbështetje të neni 100 të Kushtetutës dhe të pikave 1 e 2 të nenit 30 të ligjit nr.9048, datë 7.4.2003 “Për trashëgiminë kulturore”, të ndryshuar, me propozimin e Ministrit të Turizmit, Kulturës, Rinisë dhe Sporteve, Këshilli i Ministrave VENDOSI: 1. Shpalljen e Kalasë së Tiranës “Zonë arkeologjike “A””, sipas hartës, që i bashkëlidhet këtij vendimi dhe është pjesë përbërëse e tij. 2. Miratimin e rregullores së administrimit të Kalasë së Tiranës “Zonë arkeologjike “A”’, sipas tekstit, që i bashkëlidhet këtij vendimi dhe është pjesë përbërëse e tij. 3. Ngarkohen Ministria e Turizmit, Kulturës, Rinisë dhe Sporteve, Ministria e Brendshme, Ministria e Punëve Publike, Transportit dhe Telekomunikacionit dhe organet e njësisë së qeverisjes vendore për zbatimin e këtij vendimi. Ky vendim hyn në fuqi pas botimit në Fletoren Zyrtare. KRYEMINISTRI Sali Berisha RREGULLORE E ADMINISTRIMIT TË ZONËS ARKEOLOGJIKE “A” TË KALASË SË TIRANËS Neni 1 Qëllimi Kjo rregullore ka për qëllim përcaktimin e rregullave për administrimin dhe zonifikimin e zonës arkeologjike “A” të Klasë së Tiranës, mbështetur në ligjin nr.9048, datë 7.4.2003 “Për trashëgiminë kulturore” (i ndryshuar). Neni 2 Ndërhyrjet në zonën arkeologjike “A” Në zonën arkeolgjike “A” të Kalasë së Tiranës lejohet: 1. Restaurimi dhe konservimi i mureve rrethuese dhe strukturave të tjera të kalasë, kryerja e sondazheve dhe gërmimeve arkeologjike me synim studimin e plotë të zonës, mbi bazën e projekteve të miratuara nga Këshilli Kombëtar i Arkeologjisë dhe Këshilli Kombëtar i Restaurimeve. 2. Restaurimi i monumenteve të kulturës që përfshihen brenda kufijve të zonës arkeologjike mbi bazën e projekteve të miratuara nga Këshilli Kombëtar i Arkeologjisë dhe Këshilli Kombëtar i Restaurimeve. 3. Rikonstruksioni i rrugëve në të gjitha punimet në rrjetin inxhinierik mbi bazën e projekteve të miratuara nga Këshilli Kombëtar i Arkeologjisë dhe Këshilli Kombëtar i Restaurimeve. Neni 3 Në studimet urbanistike për qendrën e Tiranës duhet të merret parasysh bonifikimi arkeologjik i Kalasë së Tiranës dhe përcaktimet e kësaj rregulloreje. Neni 4 Kjo rregullore shoqërohet me hartën e zonifikimit, e cila rishikohet periodikisht bazuar në të dhënat e reja arkeologjike si dhe nevojën për mbrojtjen e monumenteve. Neni 5 Kësaj rregulloreje i bashkëlidhet: 1. Harta e zonifikimit me koordinatat përkatëse gjeografike të marra GPS (Garmin 60).