Regulation on the manner of registration, change, deletion, necessary accompanying documentation for registration, manner of handling, use, publication and storage of data from the information system for tobacco records

МИНИСТЕРСТВО ЗА ЗЕМЈОДЕЛСТВО, ШУМАРСТВО И ВОДОСТОПАНСТВО Врз основа на член 8 став 5 од Законот за тутун, производи од тутун и сродни производи (*) („Службен весник на Република Северна Македонија“ бр. 98/19), министерот за земјоделство, шумарство и водостопанство донесе ПРАВИЛНИК ЗА НАЧИНОТ НА ЗАПИШУВАЊЕ, ПРОМЕНАТА, БРИШЕЊЕТО, ПОТРЕБНАТА ПРИДРУЖНА ДОКУМЕНТАЦИЈА ЗА ЗАПИШУВАЊЕ, НАЧИНОТ ЗА РАКУВАЊЕ, УПОТРЕБАТА, ОБЈАВУВАЊЕТО И ЧУВАЊЕТО НА ПОДАТОЦИТЕ ОД ИНФОРМАТИВНИОТ СИСТЕМ ЗА ЕВИДЕНЦИЈА НА ТУТУН Член 1 Со овој правилник се пропишуваат начинот на запишување, промената, бришењето, потребната придружна документација за запишување, начинот за ракување, употребата, објавувањето и чувањето на податоците од информативниот систем за евиденција на тутун. Член 2 Запишувањето на податоците во информативниот систем за евиденција на тутун (во понатамошниот текст:ИСЕТ) се врши со превземање на податоци за земјоделското стопанство од Единствениот регистар на земјоделски стопанства (во понатамошниот текст:ЕРЗС). При склучување на договорот за производство и откуп на тутун од тековната реколта за запишување на податоците се дава на увид следната придружна документација: документ за идентификација (важечка лична карта) и важечко решение за упис во ЕРЗС. Член 3 Промената на податоците во ИСЕТ се врши во случај кога е внесен погрешен податок во процесот на: договарање за тип и сорта на тутун, површина и количина по катастарски парцели во договорот (во предвидениот законски рок) и откуп за дневниот откуп на тутун и исплатенот тутун. Член 4 Бришењето на податоците во ИСЕТ може да се врши во случај кога е внесен погрешен податок, а во системот не е предвиден процес за негово обележување како избришан, по писмено барање на: Министерството за земјоделство, шумарство и водостопанство; регистрираните откупувачи на тутун или Државниот инспекторат за земјоделство. Член 5 Податоците од ИСЕТ се чуваат во електронска форма во период од пет години и се употребуваат за административна контрола на барателите на финансиска поддршка, за потребите на Министерството за земјоделство, шумарство и водостопанство за следење, анализа и креирање на политиките во земјоделството и руралниот развој. Податоците од став 1 на овој член се чуваат во електронска форма, а се објавуваат во збирна форма, по типови и класи. Член 6 Овој правилник влегува во сила наредниот ден од денот на објавувањето во „Службен весник на Република Северна Македонија“. Бр.29-6727/3 Министер за земјоделство, 23 септември 2019 година шумарство и водостопанство, Скопје Трајан Димковски, с.р. 2 од 2