Regulation No. 8 on fishing for lumpfish

§ 1. Nalunaarummi pineqarpoq tunngaviusumik killeqarfiup avataani 3 sømilimiittup sineriaallu akornanni sumiiffimmi Kalaallit Nunaata aalisarnikkut oqartussaaffigisaani nipisanniarneq (Cyclopterus lumpus). Aqutsiveqarfiit

§ 2. Nipisanniarnermi aqutsiveqarfiit ilanngussaq 1-mi aalajangersarneqarput. Nassuiaatit

§ 3. Nalunaarummi matumani uku imatut paasineqassapput: 1) "Piffissaq aalisarfiusoq” ullut aalisarfiusut 60-it ataqatigiissuut. 2) ”Usinik nuussineq” pisanik taakkuninngaluunniit tunisassianik angallammiittunik umiatsiaaqqamiittunilluunniit angallammut umiatsiaaqqamulluunniit allamut nuunneqartut tamarmik, nuunneqartut usit tamarmiunersut usilluunniit ilaannarineraat apeqqutaatinnagu. Akuersissut

§ 4. Inuussutissarsiutigalugu nipisanniarnermi aalisarsinnaanermut akuersissut qinnuteqartoqarnera malillugu Aalisarnermut Piniarnermullu Naalakkersuisoqarfimmit tunniunneqartartoq piumasaqaataavoq. Imm. 2. Qinnuteqarnermut immersugassaq www.sullissivik.gl-mi pissarsiarineqarsinnaasoq qinnuteqartunit atorneqassaaq. Imm. 3. Ukiumi pisassiiffiusumi ataatsimi aqutsiveqarfinnut marlunnut akuersissummik qinnuteqartoqarsinnaavoq. Aqutsiveqarfik sumiiffik qinnuteqartup najugaqarfia kiisalu aqutsiveqarfik sumiiffik sanilerisaq. Imm. 4. Aalisarsinnaanermut akuersissutit piffissamut killiligaapput annerpaamillu pisarineqarsinnaasunut akuerineqartunut attuumassuteqaratik. Imm. 5. Angallatinut inuussutissarsiutigalugu nipisanniartunut, aalisarnermut angallat atorneqartussaq qinnuteqartup pigippagu akuersissut aatsaat tunniunneqassaaq. Pisassiissutit piffissarlu aalisarfiusoq

§ 5. Aqutsiveqarfinnut ilanngussaq 1-mi aalajangersarneqartut naapertorlugit nipisannik pisassiissutinik ukiut tamaasa Naalakkersuisut aalajangiisarput.

§ 6. Aalisarnermut Piniarnermullu Naalakkersuisoqarfimmit aalisarnermut piffissami aalajangersarneqartumi inuussutissarsiutigalugu arnarlunnik nipisanniarneq taamaallaat akuerisaavoq, tak. § 8, imm. 1

§ 7. Inuussutissarsiutigalugu inuussutissarsiutiginagulu angusallunnik nipisanniarneq piffissami 31. januar 31. marts ilanngullugu taamaallaat akuerisaavoq, taamaattorli tak. imm. 2. Imm. 2. Piffissani aalisarfiusussani Aalisarnermut Piniarnermullu Naalakkersuisoqarfimmit nipisannut arnarlunnut aalajangiiffiusuni aamma inuussutissarsiutigalugu inuussutissarsiutiginagulu angusallunnik nipisanniarneq akuerisaavoq, tak. § 8, imm. 1.

§ 8. Aqutsiveqarfinni ataasiakkaani tamani, tak. ilanngussaq 1, najukkani tunitsiveqarfiit aalisartullu peqatigiiffiinit sinniisaasa oqaloqatigereernerini, inuussutissarsiutigalugu arnarlunnik nipisanniarnermi piffissat aalisarfissat qaqugu aallartinneqassanersut Aalisarnermut Piniarnermullu Naalakkersuisoqarfik aalajangissaaq, tak. § 7, imm. 2. Imm. 2. Aallartinnissamut ulluliunneqartoq tamanut saqqummiunneqartinnagu aalisarnerup aallartinnissaanut piumasaqaatit pillugit naammassineqarsimanersut aalisartut ataasiakkaat misissuinissaanut Naalakkersuisoqarfik akuersissuteqarsinnaavoq. Imm. 3. Arnarlunnik nipisanniarnermut piffissaq aalisarfiusussaq piffissami 1. april 16. Juli ilanngullugu aallartinneqarsinnaavoq.

§ 9. Aqutsiveqarfinni ataasiakkaani tamani piffissat aalisarfiusut pisassiissutillu pillugit nalunaarutit, tusagassiuutitigut aamma Naalakkersuisut nittartagaatigut Aalisarnermut Piniarnermullu Naalakkersuisoqarfimmit nalunaarutigineqassapput. Taamatut pisassat tamarmik pisarineqarnerat nalunaarutigineqassaaq. Imm. 2. Aalisarnermut Piniarnermullu Naalakkersuisoqarfiup aqutsiveqarfimmi ataatsimi piffissap aalisarfiusup naanerata kingorna pisassiissutit pisarineqanngitsut aqutsiveqarfimmut allamut nuussinnaavai. Imm. 3. Aqutsiveqarfimmi pineqartumi nipisanniarnermut piffissat aalisarfiusussat aallartinnissaat kingusinnerpaamik sapaatip akunnera sioqqullugu Aalisarnermut Piniarnermullu Naalakkersuisoqarfiup nalunaarutigissavai. Usinik nuussineq

§ 10. Aalisarsinnaanermut akuersissuteqartup nammineq umiatsiaaraata aamma nammineq angallataata akornanni usinik nuussisinnaanermut akuersissut aalisarsinnaanermut akuersissuteqartup angallataa inuussutissarsiutigalugu aalisariutaappat Aalisarnermut Piniarnermullu Naalakkersuisoqarfimmit tunniunneqassaaq. Imm. 2. Usinik nuussisinnaanermut akuersissut aalisarsinnaanermut akuersissummi tunniunneqartumi takuneqarsinnaassaaq. Imm. 3. Usinik nuussineq nalunaaruteqartussaatitaanermut ilaanngilaq. Inuussutissarsiutiginagu nipisanniarneq

§ 11. Inuussutissarsiutiginagu nipisanniarnermut atatillugu amerlanerpaamik qassutit marluk atorneqassapput. Imm. 2. Piujuartitsineq siunertaralugu aalisarnerup teknikikkut iluarsartuussivigineqarnera pillugu nalunaarummi sukkulluunniit atuuttumi nigartat angisussaat akuerisaasut takuneqarsinnaapput.

§ 12. Inuussutissarsiutigalugu arnarlunnik nipisanniarnermut piffissami aalisarfiusussatut aalajangiiffiusumi tassani taamaallaat inuussutissarsiutiginagu arnarlunnik nipisanniarneq akuerisaavoq, tak. § 8, imm. 1. Atortunik qalluineq qassutinillu qimaannakkanik qaqitsineq

§ 13. Aalisarneq unitsinneqarpat nammineq atortorisat ingerlaannaq qaqinneqassapput. Imm. 2. Piffissap aalisarfiusup taamaatinnerani atortut qaqinneqanngitsut pisortanit qaqinneqarsinnaapput. Atortut qaqinneqassapput piginnittup akiligassaanik, taassuma kinaanera paasineqarsinnaappat.

§ 14. Qassutit aalisarnerup unitsinneqarnerata kingorna ullut arfineq marluk kingorna qaqinneqarnikuunngitsut qassutinik uninngatitsiinnartoq kinaassusersineqarsinnaanngippat inunnit namminerisamik qaqinneqarsinnaapput tigummiinnarneqarlutillu. Pineqaatissiinerit

§ 15. § 4, imm. 1-mik, §§ 6, 7, 10, 11, 12 aamma 13-mik unioqqutitsineq pinerluttulerineq pillugu inatsimmi malittarisassat malillugit akiliisitsinikkut arsaarinninnikkullu pineqaatissiinermik kinguneqarsinnaavoq. Imm. 2. Ingerlatseqatigiiffiit il. il. (inatsisitigut akisussaaffimmik tigummiartut) pinerluttulerinermut inatsimmi malittarisassat malillugit akiliisitaasinnaapput arsaarneqarsinnaallutillu. Imm. 3. Akiliisitsissutit tak. imm. 1 aamma 2 Nunatta Karsianut tutsinneqassapput. Atuutilersitsinermut atorunnaarsitsinermullu aalajangersakkat

§ 16. Nalunaarutip nalunaarutigineqareernerata aqaguani atortilissaaq. Imm. 2. Nipisanniarneq pillugu Namminersorlutik Oqartussat nalunaarutaat nr. 22, 22. juni 2021-meersoq atorunnaarsinneqarpoq. Namminersorlutik Oqartussat, ulloq 9. februari 2024 Kim Kielsen (atsior.) Aalisarnermut Piniarnermullu Naalakkersuisoq / Emanuel Rosing (atsior.) Namminersorlutik Oqartussat Imaneq 4 3900 Nuuk E-mail: nsninatsit@nanoq.gl Linkit iluaqutaasussat Kalaallit Nunaanni inatsisinut nalunaarutit Namminersorlutik Oqartussat inatsisinut toqqorsiviat Naalakkersuisut