Regulation No. 87 dated 07.02.2012 on the establishment of the Territory National Council

VENDIM Nr. 87, datë 7.2.2012 PËR PËRBËRJEN E KËSHILLIT KOMBËTAR TË TERRITORIT Në mbështetje të nenit 100 të Kushtetutës dhe të nenit 8 të ligjit nr. 10 119, datë 23.4.2009 “Për planifikimin e territorit”, të ndryshuar, me propozimin e Ministrit të Punëve Publike dhe Transportit, Këshilli i Ministrave VENDOSI: 1. Këshilli Kombëtar i Territorit, si organ vendimmarrës, kryesohet nga Kryeministri dhe ka këtë përbërje: Ministrin e Punëve Publike dhe Transportit zëvendëskryetar; Ministrin e Ekonomisë, Tregtisë dhe Energjetikës anëtar; Ministrin e Drejtësisë anëtar; Ministrin e Brendshëm anëtar; Ministrin e Bujqësisë, Ushqimit dhe Mbrojtjes së Konsumatorit anëtar; Ministrin e Turizmit, Kulturës, Rinisë dhe Sporteve anëtar; Ministrin e Mjedisit, Pyjeve dhe Administrimit të Ujërave anëtar; Zëvendësministrin e Punëve Publike dhe Transportit që mbulon fushën e planifikimit të territorit anëtar; Drejtorin e Përgjithshëm të Agjencisë Kombëtare të Planifikimit të Territorit sekretar. 2. Anëtarët e Këshillit Kombëtar të Territorit shpërblehen për çdo pjesëmarrje në mbledhje me 20 000 (njëzet mijë) lekë. 3. Shpërblimi i anëtarëve të Këshillit Kombëtar të Territorit të përballohet nga buxhetet e miratuar për çdo institucion përkatës që ata përfaqësojnë. 4. Brenda 15 ditëve kalendarike nga dita e zhvillimit të mbledhjes, Agjencia Kombëtare e Planifikimit të Territorit (AKPT), zbardh vendimet e KKT-së, të cilat ua dërgon për nënshkrim Ministrit të Punëve Publike dhe Transportit dhe Kryeministrit, me cilësinë e kryetarit të Komitetit. 5. Vendimi nr. 836, datë 3.12.2004 i Këshillit të Ministrave “Për përbërjen, organizimin dhe funksionimin e Këshillit të Rregullimit të Territorit të Republikës së Shqipërisë”, i ndryshuar, shfuqizohet. 6. Ngarkohen të gjitha institucionet, përfaqësuesit e të cilave janë përcaktuar në pikën 1, për zbatimin e këtij vendimi. Ky vendim hyn në fuqi menjëherë dhe botohet në Fletoren Zyrtare. KRYEMINISTRI Sali Berisha