Law No. 9908 amending and supplementing Law No. 9362 of 2005 on the Plant Protection Service

REPUBLIKA E SHQIPËRISË KUVENDI L I G J Nr.9908, datë 24.4.2008 PËR DISA NDRYSHIME DHE SHTESA NË LIGJIN NR.9362, DATË 24.3.2005 “PËR SHËRBIMIN E MBROJTJES SË BIMËVE” Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave, K U V E N D I I REPUBLIKËS SË SHQIPËRISË V E N D O S I: Në ligjin nr.9362, datë 24.3.2005 “Për shërbimin e mbrojtjes së bimëve”, bëhen këto ndryshime dhe shtesa: Neni 1 Kudo në ligj ndryshohen emërtimet si më poshtë: a) emërtimi “Ministria e Bujqësisë dhe Ushqimit” zëvendësohet me emërtimin “ministria që mbulon fushën e bujqësisë”; b) emërtimi “Ministri i Bujqësisë dhe Ushqimit” zëvendësohet me emërtimin “ministri që mbulon fushën e bujqësisë”; c) emërtimi “Drejtoria e Mbrojtjes së Bimëve” zëvendësohet me emërtimin “struktura përgjegjëse e mbrojtjes së bimëve (SPMB)”; ç) emërtimi “Drejtori i Mbrojtjes së Bimëve” zëvendësohet me emërtimin “drejtuesi i strukturës përgjegjëse të mbrojtjes së bimëve”; d) emërtimi “Instituti i Kërkimeve Veterinare” zëvendësohet me emërtimin “Instituti i Sigurisë Ushqimore dhe Veterinarisë”; dh) emërtimi “Instituti i Mbrojtjes së Bimëve” zëvendësohet me emërtimin “Departamenti i Mbrojtjes së Bimëve (DMB) në Universitetin Bujqësor, Tiranë”. Neni 2 Pas pikës 4 të nenit 2 shtohen pikat 4.1 e 4.2 me këtë përmbajtje: “4.1. “PMB të rrezikshme” janë PMB-të e klasifikuara: a) eksplozive; b) oksiduese; c) ekstremisht të ndezshme; ç) lehtësisht të ndezshme; d) të ndezshme; dh) shumë helmuese; e) helmuese; ë) të dëmshme; f) gërryese; g) irritante; gj) të ndjeshme; h) kancerogjene; i) mutagjene; j) helmuese për riprodhimin; k) të rrezikshme për mjedisin. 4.2. “PMB me rrezik të lartë” janë PMB-të e klasifikuara: a) shumë helmuese (të klasës 1a ose T+); b) helmuese (të klasës 1b ose T); c) ekstremisht të ndezshme; ç) lehtësisht të ndezshme; d) të rrezikshme për mjedisin.”. Neni 3 Neni 3 ndryshohet si më poshtë: “Neni 3 Shërbimi i mbrojtjes së bimëve përbëhet nga: a) Struktura përgjegjëse e mbrojtjes së bimëve; b) Instituti i Sigurisë Ushqimore dhe Veterinarisë (ISUV); c) Departamenti i Mbrojtjes së Bimëve (DMB) në Universitetin Bujqësor, Tiranë, në varësi të Ministrisë së Arsimit dhe Shkencës.”. Neni 4 Neni 5 ndryshohet si më poshtë: “Neni 5 Laboratorët e referencës dhe laboratorët e autorizuar të kontrollit 1. Laboratorë reference janë: 1.1. Laboratorët e diagnostikimit të parazitëve pranë Departamentit të Mbrojtjes së Bimëve (DMB) në Universitetin Bujqësor, Tiranë, të cilët kanë për detyrë: a) të monitorojnë parazitët karantinorë, të përcaktojnë statusin e tyre, mënyrat e kontrollit karantinor dhe të njoftojnë ministrinë që mbulon fushën e bujqësisë; b) të bëjnë diagnostikimin dhe prognozë-sinjalizimin e parazitëve, duke përcaktuar edhe masat e luftimit të tyre; c) të bëjnë provat biologjike-agronomike të PMB-ve gjatë procedurës së regjistrimit të tyre. 1.2. Laboratori i analizave cilësore të PMB-ve, si dhe i mbetjeve të tyre pranë Institutit të Sigurisë Ushqimore dhe Veterinarisë (ISUV), i cili ka për detyrë: a) të bëjë analizat fiziko-kimike të PMB-ve gjatë procedurës së regjistrimit të tyre; b) të bëjë kontrollin cilësor të PMB-ve dhe të mbetjeve të tyre në bimët dhe produktet bimore. 2. Krahas detyrave të përcaktuara në pikat 1.1 e 1.2, laboratorët e referencës duhet, gjithashtu: a) të bëjnë vlerësimin e laboratorëve të autorizuar të kontrollit, nëse janë të pajisur për kryerjen e analizave për kontrollet zyrtare. Ky vlerësim shërben për autorizimin e tyre nga ministri që mbulon fushën e bujqësisë; b) të bashkërendojnë punën dhe të ofrojnë mbështetje, përfshirë trajnime dhe shërbime të tjera për veprimtaritë laboratorike, për standardet teknike dhe mënyrat e analizave që ato kryejnë; c) të organizojnë teste paralele të mostrave të standardizuara dhe të marrin pjesë në to në nivel kombëtar dhe ndërkombëtar për monitorimin e kualifikimit të laboratorëve të autorizuar të kontrollit; ç) të garantojnë se laboratorët e autorizuar të kontrollit përdorin sistemin e tyre të brendshëm, në përputhje me standardet e kërkuara. 3. Për zbatimin e detyrave të përcaktuara në pikën 1.1 të këtij neni, ministria që mbulon fushën e bujqësisë lidh marrëveshje kontraktuale (kontratë) me Ministrinë e Arsimit dhe Shkencës. 4. Laboratorët e autorizuar të kontrollit miratohen nga ministri që mbulon fushën e bujqësisë, pas vlerësimit të kryer nga laboratorët e referencës. Si laboratorë të autorizuar të kontrollit shërbejnë laboratorët e mbrojtjes së bimëve pranë DRBUMK-së në qarqe, si dhe ato private, nëse plotësojnë kërkesat e përcaktuara në pikën 2 të këtij neni. 5. Kriteret që duhet të plotësojnë laboratorët e autorizuar të kontrollit për t'u miratuar, procedurat e miratimit dhe analizat që kryejnë përcaktohen me udhëzim të ministrit që mbulon fushën e bujqësisë. 6. Tarifat e analizave që kryhen nga laboratorët e referencës dhe laboratorët e autorizuar të kontrollit përcaktohen me udhëzim të përbashkët të ministrit që mbulon fushën e bujqësisë dhe të Ministrit të Financave.”. Neni 5 Në nenin 21 shtohet një paragraf me këtë përmbajtje: “Në Republikën e Shqipërisë regjistrohen vetëm PMB-të, të cilat janë të regjistruara në vendet e Bashkimit Europian.”. Neni 6 Në nenin 23 bëhen këto ndryshime: a) Pika 2 ndryshohet si më poshtë: “2. Importimi i PMB-ve të regjistruara, të klasifikuara “PMB të rrezikshme” dhe “PMB me rrezik të lartë”, kryhet me leje importi, të lëshuar nga drejtuesi i strukturës përgjegjëse të mbrojtjes së bimëve, ndërsa importimi i PMB-ve të tjera kryhet sipas parimit të autodeklarimit.”. b) Pika 3 ndryshohet si më poshtë: “3. Tregtimi i PMB-ve të regjistruara, të klasifikuara “PMB të rrezikshme” dhe “PMB me rrezik të lartë”, kryhet me leje tregtimi, të lëshuar nga drejtori i DRBUMK-së në qark, ndërsa tregtimi i PMB-ve të tjera kryhet sipas parimit të autodeklarimit.”. c) Pas pikës 3 shtohet pika 4 me këtë përmbajtje: “4. Formulari i autodeklarimit për importin e PMB-ve dorëzohet në ministrinë që mbulon fushën e bujqësisë, ndërsa formulari për tregtimin e tyre dorëzohet në DRBUMK-në e qarkut.”. Neni 7 Në nenin 25, pika 2 ndryshohet si më poshtë: “2. PMB-të e klasifikuara “PMB me rrezik të lartë” përdoren vetëm nga personat e përmendur në pikën 1 dhe nga ata që janë të pajisur me dëshmi aftësie të veçantë. PMB-të e klasifikuara “PMB të rrezikshme” përdoren nga persona të pajisur me dëshmi aftësie, ndërsa ato të klasifikuara “PMB-të e tjera” përdoren pa dëshmi.”. Neni 8 Në nenin 27 bëhen këto shtesa: a) Në pikën 8, pas fjalëve “në kundërshtim me kërkesat e nenit 23” shtohen fjalët “pikat 2, 3 e 4”. b) Pas pikës 10 shtohet pika 11 me këtë përmbajtje: “11. Importimi dhe tregtimi i PMB-ve, në kundërshtim me kërkesat e pikës 1 të nenit 23 të këtij ligji.”. Neni 9 Në fund të nenit 28 shtohen pikat 5 e 6 me këtë përmbajtje: “5. Për kundërvajtjet administrative të parashikuara në pikën 11 të nenit 27 të këtij ligji jepet dënim me gjobë 50 000 lekë, si dhe detyrohet subjekti të kthejë PMB-të në vendin e origjinës së marrjes së tyre. 6. Në rast përsëritjeje të kundërvajtjeve administrative të parashikuara në pikat 8 e 9 të nenit 27 të këtij ligji, subjektit i jepet dënim me gjobë 50 000 lekë dhe i hiqet e drejta e importimit ose e tregtimit të PMB-ve.”. Neni 10 Ngarkohet Ministri i Bujqësisë, Ushqimit dhe Mbrojtjes së Konsumatorit që, brenda 9 muajve nga hyrja në fuqi e këtij ligji, të bëjë rivlerësimin e regjistrimeve të PMB-ve të kryera, sipas kërkesave të parashikuara në këtë ligj. Neni 11 Ky ligj hyn në fuqi 15 ditë pas botimit në Fletoren Zyrtare. K R Y E T A R E Jozefina Topalli (Çoba)