Law No. 72/2013 amending and supplementing Law No. 9426 on livestock breeding

LIGJ Nr. 72/2013 PËR DISA NDRYSHIME DHE SHTESA NË LIGJIN NR. 9426, DATË 6.10.2005 “PËR MBARËSHTIMIN E BLEGTORISË”, TË NDRYSHUAR Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave, KUVENDI I REPUBLIKËS SË SHQIPËRISË VENDOSI: Në ligjin nr. 9426, datë 6.10.2005 “Për mbarështimin e blegtorisë”, të ndryshuar, bëhen këto ndryshime dhe shtesa: Neni 1 Në të gjithë ligjin, emërtimi “Inspektorati Zooteknik” zëvendësohet me emërtimin “Shërbimi Zooteknik”. Neni 2 Në nenin 3, pas pikës 64 shtohet pika 65 me këtë përmbajtje: “65. Kontroll zyrtar në fushën e zooteknisë” është çdo formë kontrolli për verifikimin e respektimit të kërkesave ligjore, sipas legjislacionit zooteknik, e kryer nga autoriteti kompetent përkatës, në përputhje me këtë ligj dhe ligjin nr. 10 433, datë 16.6.2011 “Për inspektimin në Republikën e Shqipërisë””. Neni 3 Neni 68 ndryshohet si më poshtë: “Neni 68 Organet e kontrollit që mbulojnë fushën e zooteknisë 1. Shërbimi zooteknik siguron kontrollin për plotësimin e kushteve për mbarështimin e qëndrueshëm të kafshëve të fermës, përmirësimin racor dhe të ushqyerit të kafshëve dhe tregtimin e materialeve racore. 2. Shërbimi zooteknik është pjesë e shërbimit veterinar.”. Neni 4 Në nenin 69 fjalët “Inspektori i zooteknisë” zëvendësohen me fjalët “Zootekniku zyrtar”. Neni 5 Në nenin 70 bëhen ndryshimet si më poshtë: 1. Fjalët “Inspektori i zooteknisë” zëvendësohen me fjalët “Zootekniku zyrtar”. 2. Pas shkronjës “h” shtohet një paragraf me këtë përmbajtje: “Masat përmirësuese, të parashikuara në këtë ligj, mund të vlerësohen nga vetë zootekniku zyrtar, sipas nevojave të rastit, si masa urgjente ose dënime plotësuese.”. Neni 6 Në nenin 90 pika 1, para fjalëve “me gjobë” shtohen fjalët “me dënim kryesor”. Neni 7 Neni 91 ndryshohet si më poshtë: “Neni 91 Procedura e dhënies së masës administrative 1. Të drejtën e dhënies së masës administrative e ka zootekniku zyrtar që mbulon fushën e zooteknisë. 2. Kundër vendimit të zooteknikut zyrtar mund të bëhet ankim në përputhje me ligjin për inspektimin.”. Neni 8 Dispozitë kalimtare Organi ekzistues inspektues vazhdon të ushtrojë funksionin e vet sipas organizimit aktual deri në krijimin e organit të ri, sikurse parashikohet në ndryshimet e bëra në këtë ligj. Neni 9 Ky ligj hyn në fuqi 15 ditë pas botimit në Fletoren Zyrtare. Miratuar në datën 14.2.2013 Shpallur me dekretin nr. 8031, datë 1.3.2013 të Presidentit të Republikës së Shqipërisë, Bujar Nishani