Instruction no. 10, dated 26 February 2021 on the manner of organizing and implementing the procedures of public procurement center for the contracting authority of national veterinary and plant protection authority

UDHËZIM Nr. 10, datë 26.2.2021 MBI MËNYRËN E ORGANIZIMIT DHE REALIZIMIT TË PROCEDURAVE TË PËRQENDRUARA TË PROKURIMIT PUBLIK PËR AUTORITETIN KONTRAKTOR AUTORITETI KOMBËTAR I VETERINARISË DHE MBROJTJES SË BIMËVE Në mbështetje të nenit 102, pika 4 të Kushtetutës së Republikës së Shqipërisë, ligjit nr. 9643, datë 20.11.2006 “Për prokurimin publik”, i ndryshuar, dhe vendimit të Këshillit të Ministrave nr. 914, datë 29.12.2014 “Për miratimin e rregullave të prokurimit publik”, i ndryshuar, si rezultat i mungesës së kapaciteteve në institucionet e varësisë për realizimin me sukses të procedurave UDHËZOJ: 1. Realizimin e procedurave, me vlerë mbi 800,000 (tetë qind mijë) lekë pa TVSH në mënyrë të përqendruar për Autoritetin Kombëtar të Veterinarisë dhe Mbrojtjes së Bimëve. 2. Ministria e Bujqësisë dhe Zhvillimit Rural merr përsipër rolin e Organit Qendror Blerës për zhvillimin e procedurave së prokurimit në emër dhe për llogari të Autoritetit Kombëtar të Veterinarisë dhe Mbrojtjes së Bimëve. 3. Ministria e Bujqësisë dhe Zhvillimit Rural është përgjegjëse për kryerjen e të gjithë procedurave të prokurimit sipas pikës 1 të këtij udhëzimi, që nga hartimi i specifikimeve teknike, njoftimi i kontratës e deri te publikimi i njoftimit të nënshkrimit të kontratës në sistemin elektronik të prokurimeve. 4. Pas njoftimit të fituesit, Ministria e Bujqësisë dhe Zhvillimit Rural dërgon pranë Autoritetit Kombëtar të Veterinarisë dhe Mbrojtjes së Bimëve, dokumentacionin e plotë në formë të shkruar për të vijuar me nënshkrimin e kontratës përkatëse. 5. Për procedurat e prokurimit të cilat realizohen nga ABP dhe/ose AKSHI, Ministria e Bujqësisë dhe Zhvillimit Rural në bashkëpunim me Autoritetin Kombëtar të Veterinarisë dhe Mbrojtjes së Bimëve, merr përsipër hartimin e specifikimeve teknike, si dhe dërgimin e tyre pranë autoriteteve përkatëse. 6. Autoriteti Kombëtar të Veterinarisë dhe Mbrojtjes së Bimëve është përgjegjës për ndjekjen dhe realizimin e kontratës. 7. Autoriteti Kombëtar i Veterinarisë dhe Mbrojtjes së Bimëve do të jetë përfituesi i mallrave/shërbimeve/punëve objekt prokurimi. 8. Ngarkohen për zbatimin e këtij udhëzimi, Sekretari i Përgjithshëm dhe Autoritetit Kombëtar të Veterinarisë dhe Mbrojtjes së Bimëve. Ky udhëzim hyn në fuqi menjëherë. MINISTËR I BUJQËSISË DHE ZHVILLIMIT RURAL Milva Ekonomi