Decision No. 213 dated 31.3.2010 approving the composition of the national committee of spiritual cultural heritage

VENDIM Nr.213, datë 31.3.2010 PËR MIRATIMIN E PËRBËRJES SË KOMITETIT KOMBËTAR TË TRASHËGIMISË KULTURORE SHPIRTËRORE DHE PËRCAKTIMIN E MASËS SË SHPËRBLIMIT TË ANËTARËVE TË TIJ Në mbështetje të nenit 100 të Kushtetutës dhe të pikës 1 të nenit 6 të ligjit nr.9048, datë 7.4.2003 "Për trashëgiminë kulturore", të ndryshuar, me propozimin e Ministrit të Turizmit, Kulturës, Rinisë dhe Sporteve, Këshilli i Ministrave VENDOSI: 1. Komiteti Kombëtar i Trashëgimisë Kulturore Shpirtërore të kryesohet nga ministri përgjegjës për trashëgiminë kulturore dhe në përbërje të tij të jenë: Drejtori i drejtorisë përgjegjëse për trashëgiminë kulturore sekretar; Përgjegjësi i sektorit për trashëgiminë kulturore anëtar; Një specialist për trashëgiminë shpirtërore, pranë ministrisë përgjegjëse për trashëgiminë kulturore anëtar; Sekretari i Komitetit Kombëtar të UNESCO-s, pranë Ministrisë së Punëve të Jashtme anëtar; Një specialist i muzikës popullore (etnomuzikolog) anëtar; Një specialist i folklorit, gjuhës dhe dialekteve (etnolog) anëtar; Një specialist i etnografisë, riteve dhe shfaqjeve popullore (etnograf) anëtar; Një specialist i vallëzimit popullor dhe lojërave popullore (etnokoreolog) anëtar; Një specialist i katalogimit të trashëgimisë shpirtërore (dixhitalizues) anëtar; Një specialist i menaxhimit të trashëgimisë dhe turizmit kulturor (menaxher), anëtar. 2. Anëtarët e Komitetit Kombëtar të Trashëgimisë Kulturore Shpirtërore, të përmendur në pikën 1, caktohen nominalisht me urdhër të ministrit përgjegjës për trashëgiminë kulturore. 3. Mbledhjet e Komitetit Kombëtar të Trashëgimisë Kulturore Shpirtërore thirren, si rregull, nga kryetari, jo më shumë se 4 herë në vit. 4. Anëtarët e këtij komiteti, të cilët nuk punojnë në sistemin e institucioneve shtetërore të specializuara, përfitojnë një shpërblim prej 5000 (pesë mijë) lekësh për çdo mbledhje. 5. Pagesa për shpërblimin të përballohet nga buxheti i ministrisë përgjegjëse për trashëgiminë kulturore. 6. Ngarkohet ministria përgjegjëse për trashëgiminë kulturore për zbatimin e këtij vendimi. 7. Vendimi nr.723, datë 14.5.2008 i Këshillit të Ministrave "Për përbërjen e Komitetit Kombëtar të Trashëgimisë Kulturore Shpirtërore", shfuqizohet. Ky vendim hyn në fuqi pas botimit në Fletoren Zyrtare. KRYEMINISTRI Sali Berisha